ქვეყნის მთავარი სატრანზიტო ავტომაგისტრალის შემადგენელი ნაწილის – 12-კილომეტრიანი აგარა-ზემო ოსიაურის მონაკვეთის მშენებლობა წლის ბოლოს დასრულდება.
როგორც ”ფორტუნას” რეგიონული განვითარებისა და ინფრასტრუქტურის სამინისტროდან აცნობეს, აღნიშნული გზის 7 კმ-იან მონაკვეთზე ცემენტ-ბეტონის საფარის მოწყობის დასრულება და ავტოტრანსპორტის მოძრაობის გახსნა მიმდინარე წლის მაისის ბოლოსთვის არის დაგეგმილი.
ამ დროისთვის, აღნიშნულ მონაკვეთზე ბეტონის საფარის მოწყობა და ხელოვნური ნაგებობების სამშენებლო სამუშაოები მიმდინარეობს. სამუშაოებს ქართული კომპანია Black Sea Group-ი და ქუვეითური კომპანია Copri Construction Enterprises W.L.L აწარმოებენ.
პროექტი მსოფლიო ბანკის დაფინანსებით ხორციელდება და მისი ღირებულება 105 მლნ. ლარზე მეტია.
როგორც უწყებაში აცხადებენ, აგარა–ზემო ოსიაურის მონაკვეთის ექსპლუატაციაში შესვლით, გაიზრდება ჩქაროსნული გზის გამტარუნარიანობა, ავტოტრანსპორტის მოძრაობის უსაფრთხოების დონე და შემცირდება მგზავრობის დრო.
მონაკვეთზე მიმდინარე სამუშაოები საავტომობილო გზების დეპარტამენტის თავმჯდომარის პირველმა მოადგილემ ნუგზარ გასვიანმა მსოფლიო ბანკის მისიის წარმომადგენლებთან ერთად დაათვალიერა. მსოფლიო ბანკის მისია საქართველოში უკვე რამდენიმე დღეა იმყოფება და დეპარტამენტის წარმომადგენლებთან ერთად ბანკის მიერ დაფინანსებული პროექტების მონიტორინგს ახორციელებს.