თბილისის საბავშვო ბაგა-ბაღებში მენიუ შეიცვალა. როგორც დედაქალაქის ბაგა-ბაღების მართვის სააგენტოს ხელმძღვანელმა კახა გვანცელაძემ პირველ არხს განუცხადა, კვების რაციონში გაიზარდა რძის პროდუქტების ულუფები – რძე, ყველი, ხაჭო, მაწონი და არაჟანი. ასევე დაემატა ბოსტნეულის სახეობები – ბროკოლი, მჟაუნა, ისპანახი, მწვანე ხახვი, რეჰანი.
რაც შეეხება სადილს, როგორც გვანცელაძე ამბობს, მშობლების მოთხოვნის საფუძველზე, რაციონიდან ამოღებულია შემდეგი კერძები: სიმინდის ფქვილის პროდუქტი, კერძოდ ფაფა და ღომი, ასევე ამოღებულია ჩიხირთმის წვნიანი.
მისივე განმარტებით, ცვლილებების შედეგად, საკვებს დაემატა აუცილებელი ვიტამინები და მინერალები და საუზმე გახდა მრავალფეროვანი, სამკომპონენტიანი, რაც ბავშვს არჩევანის საშუალებას აძლევს.
ცვლილებები იანვრიდან, ზამთრის არდადეგების შემდეგ ამოქმედდა.