შინაგან საქმეთა სამინისტრომ “ტვიტერში” პრეზიდენტ სალომე ზურაბიშვილის გვერდზე კიბერთავდასხმის შესაძლო ფაქტის შესწავლა დაიწყო.
საქმე ეხება სალომე ზურაბიშვილის ოფიციალურ ანგარიშზე აშშ-ის პრეზიდენტ დონალდ ტრამპის პოსტის გაზიარებას.
„შსს-ს მიერ ხორციელდება ოპერატიულ-სამძებრო ღონისძიება, დანაშაულის ნიშნების გამოკვეთის შემთხვევაში დაიწყება გამოძიება,“- განუცხადეს ფორტუნას შსს-ში.
სალომე ზურაბიშვილის ტვიტერის ოფიციალურ გვერდზე აშშ-ის პრეზიდენტის დონალდ ტრამპის ის ტვიტი იყო გაზიარებული, სადაც ტრამპი პრეზიდენტობის კანდიდატს ჯო ბაიდენს „მძინარას” უწოდებს. მოგვიანებით პოსტი წაშალეს. პრეზიდენტის ადმინისტრაციაში განმარტეს, რომ სოციალური ქსელების მართვის მენეჯერმა ის შემთხვევით გააზიარა.