სინოპტიკოსები საქართველოს მთელ ტერიტორიაზე, უახლოეს დღეებში თბილ და უნალექო ამინდს გვპირდებიან. დღეიდან 10 მარტის ჩათვლით ქვეყნის ყველა რეგიონში ტემპერატურა რამდენიმე გრადუსით მოიმატებს.
გარემოს ეროვნული სააგენტოს ინფორმაციით, 7-8 მარტს ჰაერის ტემპერატურა დღის საათებში, დასავლეთ საქართველოს დაბლობში +20, +25 გრადუსი იქნება, ხოლო 9-10 მარტს 2-3 გრადუსით კიდევ უფრო დათბება.
სააგენტოს ცნობით, ტემპერატურა მოიმატებს აღმოსავლეთ საქართველოშიც, სადაც ბარში +17, +22 გრადუსის ფარგლებში შენარჩუნდება. ჰაერის ტემპერატურა მოიმატებს და დათბება საქართველოს მთიან და მაღალმთიან რეგიონებშიც.
რაც შეეხება დედაქალაქს, სინოპტიკოსების ვარაუდით, თბილისში უახლოეს დღეებში, თბილი და უნალექო ამინდია მოსალოდნელი. ჰაერის ტემპერატურა 6-9 მარტს +18, +20 გრადუსი დაფიქსირდება, ხოლო 10 მარტს +22 გრადუსამდე მოიმატებს.