რუსი მომღერალი დიმა ბილანი, რომელიც პუტინის ფავორიტთა სიაშია, ღიად არ საუბრობს რუსულ აგრესიაზე უკრაინაში. მომღერალი „კომსომოლსკაია პრავდასთან“ საუბარში არც გმობს, მაგრამ არც აქებს რუსეთის აგრესიას უკრაინის ტერიტორიაზე: „ახლა ყველა საუბრობს 8 წელს, როცა ეს კონფლიქტი მძაფრდებოდა. არ ვიცი, როგორ, მაგრამ ეს 8 წელი გამომეპარა, ახლა ვიწყებ ამაზე ფიქრს, ახლა ვაანალიზებ“- ამბობს დიმა ბილანი
ჟურნალისტის კითხვაზე, უჭერს თუ არა მხარს რუსეთის მიერ დაწყებულ სპეცოპერაციას, მუსიკოსი პასუხისგან თავს იკავებს: „ეს ნამდვილად ტრაგედიაა, ამაზე ადრე ბევრი უნდა გველაპარაკა. შემიძლია გითხრათ, თუ დონბასის მოსახლეობას შემოქმედებითად დავჭირდები, მათ გვერდში დავუდგები, სხვას ვერაფერს ვიტყვი“ – დასძენს ბილანი.