მიხეილ სააკაშვილის დედამ, გიული ალასანიამ ჟურნალისტებთან საუბარში კომენტარი გააკეთა „ვივამედის“ დირექტორის, ნინო ნადირაძის მიერ სასამართლოსთვის დღეს მიცემულ ჩვენებასთან დაკავშირებით.
„მე რაც მოვისმინე სასამართლოდან, იყო ლაპარაკი იმაზე, რომ საცივს მიირთმევს. ნამდვილად იყო ასეთი შემთხვევა ახალ წელს. მისთვის ძალიან ძვირფასმა ადამიანმა გამოუგზავნა საცივი. ძალიან ცოტა შეჭამა და მერე გაუნაწილა იქ ადამიანებს, მაგრამ შემდეგ, მეორე და მესამე დღეს სულ პირღებინება ჰქონდა. ეს არის ადამიანი, რომელსაც ჭამა უყვარს, მაგრამ ახლა ვერ ჭამს. თქვენი თავი წარმოდგინეთ, მოწამლული როცა ხართ, როგორ შეჭამთ?
ეს კი მუდმივად, რამდენი თვეა, მოწამლულია. ეს არის მიზეზი. რას ნიშნავს თავის დაზიანება, თავი როგორ უნდა დაეზიანებინა? ამდენ ხანს როგორ გაძლებს ადამიანი? 38 კილო აქვს დაკლებული. ის რომ საცივს ჭამდეს ყოველდღე, როგორ დაიკლებდა? არ უნდა იყო ადამიანი ნორმალური, რომ სპეციალურად აკეთებდე და არ არის ასე საქმე, ამდენმა ფსიქიატრმა გასინჯა. მართლა ვერ ჭამს. ერთადერთი შემთხვევა იყო, როდესაც მოინდომა ნივრიანი პური და ცოტა გადავუსვი კარაქთან ერთად ცოტა ნიორი და ამას დააბრალეს გულის წასვლა. გულის წასვლა ხშირად ემართება და ნიორი რა შუაშია? პირველად გავიგე. ანეკდოტურ მდგომარეობაში ვართ “, – განაცხადა გიული ალასანიამ.
რაც შეეხება დღევანდელ მდგომარეობას, ალასანიას თქმით, სააკაშვილი არის ძალიან სუსტად.
„ყველა ექიმი ერთხმად ამბობს, რომ ინტოქსიკაციას, რომელიც აქვს, აქ ვერ მოერევიან. იმდენი დიაგნოზი აქვს ამ მოწამვლასთან ერთად, რომ ექიმები ამბობენ, ვერავინ ვერ მოვკიდებთ ამას ხელსო. ადამიანი იყო ენერგიული, გვახსოვს და ვერ გავიგე, რა უნდათ, მაინცდამაინც უნდა მოკლან? არ მგონია, რომ უნდათ, მაინცდამაინც მოკლან, რადგან არავინ არ ჩავარდება კარგ მდგომარეობაში“, – განაცხადა ალასანიამ.
რა ითქვა დღეს სასამართლო პროცესზე:
ნადირაძე: არის შურაცხყოფების კასკადი, მუქარები, მუდმივად მიწევს მედპერსონალის გამხნევება