თურქეთში მომხდარი მიწისძვრის შემდეგ, ნანგრევებში მოყოლილი საქართველოს ორი მოქალაქის პოვნა ამ ეტაპზე ვერ ხერხდება.
თურქეთში საქართველოს ელჩის გიორგი ჯანჯღავას თქმით, ღამით საქართველოს 4 მოქალაქე იპოვეს:
„გუშინ მთელი დღის განმავლობაში შემოდიოდა ზარები. ვიპოვეთ ჩვენი რამდენიმე მოქალაქე. ღამისთვის, პრაქტიკულად, 6 მოქალაქის ძიების პროცესი მიმდინარეობდა. საბედნიეროდ, ოთხი მოქალაქე ვიპოვეთ. ისინი გადაყვანილები არიან დაცულ სივრცეში, ჯანმრთელად და კარგად არიან. ჩვენი 2 მოქალაქე, რომელიც ნანგრევებშია მოყოლილი, ჯერჯერობით ვერ ვიპოვეთ. სამუშაოები გრძელდება“, – განაცხადა გიორგი ჯანჯღავამ.
ელჩის თქმითვე, ამ დროისთვის არსებული მონაცემებით, თურქეთში მომხდარი მიწისძვრის შედეგად, გარდაიცვალა საქართველოს 2 მოქალაქე, 100-ზე მეტი იპოვეს, 2 კი ამ დრომდე დაკარგულია.
საქართველო თურქეთში მაშველების დამატებით ჯგუფს აგზავნის
ცნობისათვის, 4 თებერვლის შემდეგ, თურქეთსა და სირიაში მომხდარი რამდენიმე დამანგრეველი მიწისძვრის შედეგად გარდაცვლილთა საერთო რიცხვმა 9 000-ს მიაღწია.
თურქეთის ვიცე-პრეზიდენტის განცხადებით, მიწისძვრების შედეგად დაშავდა 34 810 ადამიანი, განადგურდა 5 775 შენობა.
სამძებრო-სამაშველო ოპერაციის ფარგლებში მაშველებმა 8 000-ზე მეტი ადამიანი გადაარჩინეს. სტიქიის ზონაში თურქეთის ყველა უწყებიდან 60 000-ზე მეტი ადამიანი მუშაობს.
რაც შეეხება სირიას, ბოლო ცნობებით, სირიაში მსხვერპლის რიცხვი 2 530-მდე გაიზარდა.