კახი კალაძემ რიყის პარკში უფუნქციოდ დარჩენილი შენობის ე.წ. „რიყის დოქების“ შესახებ ისაუბრა და აღნიშნა, რომ მშენებლობის დასრულება საკმაოდ დიდ თანხებთან არის დაკავშირებული. თბილისის მერის განცხადებით, შენობის სიმბოლურ ფასად, 1 ლარად მიღებაზე ინვესტორები უარს აცხადებენ.
„როდესაც ნახეს, თუ რა ხარჯებთან იყო დაკავშირებული, ყველამ უარი განაცხადა. სამუშაოების დასრულებას, დაახლოებით, 18-20 მილიონი სჭირდება. შესაბამისად, ასეთი პროექტების განხორციელება ბიზნესისთვის რთულია. შიგნით არის დაუმთავრებელი ოთხსართულიანი შენობა. იქ ძალიან დიდი სიბინძურეა. შესაბამისად, ამას ერთიანი მიდგომა სჭირდება, რაც საკმაოდ დიდ თანხებთან არის დაკავშირებული“, – აღნიშნა თბილისის მერმა.
შეგახსენებთ, რომ „რიყის დოქების“ მშენებლობა წინა ხელისუფლების დროს დაიწყო და 2012 წელს დასრულდა. ნაგებობა ამჟამად ეკონომიკის სამინისტროს მფლობელობაშია.
