20 ოქტომბერს, ლუვრის ძარცვიდან სულ რაღაც ერთი დღის შემდეგ, საფრანგეთში კიდევ ერთი მუზეუმი გახდა ქურდების სამიზნე. ქალაქ ლანგრში, ქვეყნის ჩრდილოეთ ნაწილში მდებარე ცნობილი ფილოსოფოსისა და განმანათლებლის – დენი დიდროს მუზეუმიდან (La Maison des Lumières Denis Diderot) ერთ ღამეში ოქროსა და ვერცხლის 2000 მონეტა გაქრა. BBC-ის ინფორმაციით, ბევრი მათგანი უნიკალურია.
გამოძიების ცნობით, ქურდები გამოუცდელები არ ყოფილან – ისინი მიზანმიმართულად ეძებდნენ სწორედ ამ მონეტებს, სავარაუდოდ, კოლექციონერის შეკვეთით.
მუზეუმის კარზე გამოკრულია წარწერა:
„მუზეუმი დახურულია საგანგებო შემთხვევის გამო“.
გამომძიებელი ფიქრობს, რომ საქმე, როგორც ჩანს, ცალკეულ შემთხვევასთან კი არა, წინასწარ დაგეგმილ მუზეუმების ძარცვის სერიასთან გვაქვს.
ქურდობების ჯაჭვი სექტემბერში დაიწყო:
ჯერ ორჯერ გაძარცვეს ყოფილი პრეზიდენტის – ჟაკ შირაკის მუზეუმი, საიდანაც საათები, იუველირული ნივთები და დიპლომატიური საჩუქრები წაიღეს;
შემდეგ დაზარალდა ლიმოჟის ფაიფურის მუზეუმი (Le Musée national Adrien Dubouché), საიდანაც ქურდებმა წაიღეს რამდენიმე ჩინური ვაზა, რომელთა ღირებულება 6,5 მილიონ ევროს აღემატება;
ბოლოს კი გაძარცვეს ბუნების ისტორიის ეროვნული მუზეუმი, საიდანაც მოიპარეს ოქროს ნატეხები – 1,5 მილიონ ევროს ოდენობით.
საფრანგეთის პოლიცია აპირებს ყველა ეს შემთხვევა ერთ გამოძიებაში გააერთიანოს, რათა საბოლოოდ მოახერხოს ორგანიზებული ჯგუფის გამოვლენა და დაკავება.
