საქართველოს კულტურისა და ძეგლთა დაცვის სამინისტროსა და თბილისის მერიის მხარდაჭერით, ბელგიაში, ქალაქ ბრიუსელის ნატიფი ხელოვნების სასახლეში, ცნობილი ქართველი კომპოზიტორის იუბილე აღინიშნება. გია ყანჩელი ბოლო წლებია, სწორედ ბელგიაში ცხოვრობს და მოღვაწეობს. წელს 10 აგვისტოს მას 80 წელი შეუსრულდა.
28 სექტემბერს, საღამოს რვა საათზე გაიმართება საიუბილეო კონცერტი, რომელშიც საქართველოს ეროვნული სიმფონიური ორკესტრი, ნიკოლოზ რაჭველის დირიჟორობით, გიორგი ცაგარელი, ნატო მეტონიძე და ლიზა ბაგრატიონი მიიღებენ მონაწილეობას. შესრულდება კომპოზიტორის ვოკალური და კამერულ-ინსტრუმენტული ნაწარმოებები.
ღონისძიების მხარდამჭერები ასევე არიან, ბელგიის სამეფო საქართველოს საელჩო და ფლანდრიის მთავრობის საგარეო საქმეთა დეპარტამენტი. კონცერტს დაესწრებიან საერთაშორისო ორგანიზაციებისა და საელჩოების წარმომადგენლები.
საქართველოს კულტურის სამინისტროს მხარდაჭერით, გია ყანჩელის იუბილესადმი მიძღვნილი კონცერტი 22 აგვისტოს ბერლინის კონცერტჰაუსში შედგა.