საქართველოს პრეზიდენტმა და პირველმა ლედიმ დიპლომატიური კორპუსის და მთავრობის წარმომადგენლებს საახალწლო მიღებაზე უმასპინძლეს.
გიორგი მარგველაშვილმა დამდეგი ახალი წელი დამსწრე საზოგადოებას მიულოცა და 2015 წელი შეაჯამა.
„2015 წელს, ჩვენ შევძელით ქვეყნის განვითარება რამდენიმე მნიშვნელოვანი მიმართულებით. გვქონდა შესაძლებლობა ბეჯითად გვემუშავა საქართველოს ევროინტეგრაციის დღის წესრიგზე. გადავდგით მნიშვნელოვანი ნაბიჯები საქართველო-NATO-ს ურთიერთობის განვითარების მიმართულებით. ერთად ვმუშაობთ დემოკრატიისა და ჩვენს ქვეყნებს შორის პარტნიორობის გაძლიერებისათვის. ბეჯითად ვმუშაობთ, აღმოსავლეთსა და დასავლეთს შორის პარტნიორობის თვალსაზრისით, საქართველოს განსაკუთრებული როლის მნიშვნელოვნად იდენტიფიცირებისა და გაძლიერებისათვის. საერთაშორისო გეოპოლიტიკურ რუკაზე საქართველოს მეტად დამკვიდრებისათვის, რომ ეს ადგილი მეტად სასარგებლო გავხადოთ მთელს მსოფლიოში ჩვენი ყველა პარტნიორისათვის.“-განაცხადა საქართველოს პრეზიდენტმა.
მან სიტყვით გამოსვლისას ყურადღება გაამახვილა 2016 წლის გამოწვევებზეც:
„ჩვენ ერთად გვაქვს სამუშაო მნიშვნელოვან საკითხებზე, უსაფრთხოების გაძლიერებაზე მთელს რეგიონში. ბეჯითად უნდა ვიმუშაოთ, რათა გავაძლიეროთ მშვიდობიანი პროცესები და მშვიდობის შემდგომი განმტკიცება უკრაინაში, მოლდოვაში, ასევე გავაძლიეროთ იმ ქვეყნების სუვერენიტეტი და ტერიტორიული მთლიანობა, რომლებმაც მტკიცედ და ნათლად განაცხადეს საკუთარი დასავლური არჩევანის შესახებ.
ჩვენ ძალიან აქტიურად უნდა ვიმუშაოთ რეგიონის უსაფრთხოებაზე, იმისათვის, რომ დავძლიოთ კონფლიქტი უკრაინაში, მოვახდინოთ პროცესების სტაბილიზაცია სირიაში, ვიყოთ უფრო აქტიურები ავღანეთსა და ერაყში განვითარებულ პროცესებთან დაკავშირებით. საქართველოს მნიშვნელოვანი წვლილი შეაქვს ამ მიზნის მიღწევაში.“-განაცხადა საქართველოს პრეზიდენტმა.
გიორგი მარგველაშვილმა დიპლომატიურ კორპუსს მადლობა გადაუხადა საქართველოში გაწეული საქმიანობისთვის და კიდევ ერთხელ აღნიშნა, რომ
დიპლომატიური კორპუსი, რომელიც საქართველოში მუშაობს, მნიშვნელოვან როლს ასრულებს, თავისი აშკარა და ძალიან ნათელი ჩართულობით საქართველოს დღის წესრიგის, განსაკუთრებით დემოკრატიული განვითარების კუთხით.
საქართველოს პრეზიდენტი კიდევ ერთხელ მიესალმა ჩინეთის ახალ ელჩს, რომელმაც დღეს გიორგი მარგველაშვილს რწმუნებათა სიგელი გადასცა და მას წარმატება უსურვა. სახელმწიფოს მეთაურმა სიტყვით გამოსვლისას მწუხარება გამოთქვა და სინანულით გაიხსენა რამდენიმე დღის წინ გარდაცვლილი დიპლომატი დავით ჭაჭუა.
გიორგი მარგველაშვილმა კიდევ ერთხელ მიულოცა დამდეგი 2016 წელი დიპლომატიური კორპუსის და მთავრობის წარმომადგენლებს და მათ ბედნიერი შობა – უსურვა.
