![შეკვეთილთან ივანიშვილის მიერ კეთილმოწყობილი პარკი იხსნება [ფოტოები]](https://cdn.fortuna.ge/app/uploads/2019/05/59530499_1117574408415265_7614960209600970752_n.jpg)
ოზურგეთში, შეკვეთილთან, ახალი დასასვენებელი პარკი გაიხსნება. პარკი, რომელიც ბიძინა ივანიშვილის დაფინანსებით კეთილმოეწყო, ურეკსა და ოზურგეთს შორის, წვერმაღალას გზაზე მდებარეობს. ამის შესახებ ინფორმაცია ბიძინა ივანიშვილის ფეისბუქ გვერდზე ვრცელდება.
არსებული ინფორმაციით, პარკი ყოველდღე, დილის 10-დან 19 საათამდე ღია იქნება ნებისმიერი მნახველისთვის.
გასულ წლებში ამ ტერიტორიაზე, ბიძინა ივანიშვილის დაფინანსებით, კიპარისები გაშენდა და დაჭაობებული ტერიტორიაზე დროთა განმავლობაში კორომები ჩამოყალიბდა.
ეზო, რომელსაც წვერმაღალასკენ ასასვლელი გზა ორად ყოფდა, გაერთიანდა და მოშორებით ახალი, ბეტონის გზა დაიგო. ამ ტერიტორიაზე გზა მთლიანად იყო დანგრეული, ახლა კი ბეტონის საფარია დაგებული.
წვერმაღალას პარკის ტერიტორიაზე არსებულ ბაღში მდებარე პატარა ტბა გაფართოვდა, გარშემო დაირგო ტირიფები, ბამბუკები და სხვა ხე-მცენარეები. პარკი ორ იარუსიანია. მეორე იარუსზე, დაახლოებით 50 მეტრ სიმაღლეზე, გაკეთდა ასასვლელი კიბეები, საიდანაც დამსვენებელს ზღვის პეიზაჟის ნახვა შეეძლება.პარკის მეორე დონეზე ახალი მანდარინების ბაღი გაშენდა, იქვეა დასასვენებელი სახლი და რამდენიმე ფანჩატური.
რაც შეეხება შეკვეთილის დიდ დენდროლოგიურ პარკს, რომელიც თავისი მასშტაბით უნიკალურია არა მხოლოდ საქართველოში, არამედ კავკასიის რეგიონში, მომავალ წელს გაიხსნება.