სტამბოლსა და თბილისს შორის საჰაერო მიმოსვლა, დიდი ალბათობით, ივნისიდან განახლდება. როგორც თურქული მედია იუწყება, თურქეთის ფლაგმანი ავიაკომპანია Turkish Airlines კორონავირუსის პანდემიის გამო შეჩერებულ, შიდა და საერთაშორისო ავიარეისებს ეტაპობრივად , ზაფხულის 3 თვის განმავლობაში აღადგენს.
3 თვიანი განრიგის მიხედვით, ავიაკომპანია ივნისში კვირაში 75 სიხშირით, 19 ქვეყნის 22 პუნქტში იფრენს. ამავე განრიგში მოხვდა საქართველოს დედაქალაქიც. სტამბოლი-თბილისის საჰაერო ხაზზე ოპერირებას Turkish Airlines ივნისის თვიდან განაახლებს და კვირაში 4 სიხშირით, აეროპორტ „სტამბოლიდან“ იფრენს.
დანარჩენი 18 ქვეყანა კი, სადაც ავიაკომპანია ფრენებს განაახლებს, შემდეგია: კანადა, ყაზახეთი, ავღანეთი, იაპონია, ჩინეთი, სამხრეთ კორეა, სინგაპური, დანია, შვედეთი, გერმანია, ნორვეგია, ავსტრია, ნიდერლანდები, ბელგია, ბელორუსი, ისრაელი, ქუვეითი და ლიბანი.
შეგახსენებთ, ცნობილი თურქული ავიაკომპანია ჩვენს ქვეყანაში 1997 წლიდან დაფრინავს. ჯამში, საქართველოდან სტამბოლის გავლით, შესაძლებელია 300-ზე მეტი მიმართულებით გამგზავრება.