დუეინ ჯონსონმა და მისი ოჯახის წევრებმა კორონავირუსი დაამარცხეს. აღნიშნული ინფორმაცია „ინსტაგრამზე“ განთავსებული სპეციალური ვიდეომიმართვით თავად ვარსკვლავმა გაავრცელა. ჯონსონის თქმით, მისი მთელი ოჯახი კოვიდ-19-ით იყო ინფიცირებული, მათ შორის მისი 4 და 2 წლის ქალიშვილები, ჟასმინი და ტიანა, ასევე მისი მეუღლე ლორენ ჰაშიენი.
თუმცა 48 წლის მსახიობის თქმით, ისინი ამ ეტაპზე ინფექციის გამავრცელებლები აღარ არიან და სულ ცოტა აშორებთ სრულ გამოჯანმრთელებამდე.
ჯონსონმა თავის 196 მილიონ „ფოლოვერს“ მოუწოდა სათანადოდ აღიქვან საფრთხე და დაიცვან რეკომენდაციები, მოერიდონ ხალხმრავალ ადგილებს და ატარონ პირბადეები, ასევე დაიცვან ჰიგიენის ნორმები.
დუეინის თქმით, კორონავირუსის მკურნალობის პროცესი არაფრით ჰგავდა მრავალრიცხოვანი ტრავმებისა და დაზიანებების მიღების შემდეგ მკურნალობას, რაც მას აქამდე არაერთხელ გამოუცდია.
აქამდე უცნობია გულისხმობდა თუ არა ვარსკვლავი „მთელ ოჯახში“ თავის ყოფილ მეუღლეს და ბიზნეს-პარტნიორს, დანი გარსიას და მათ საერთო ქალიშვილს, 18 წლის სიმონეს.
