“ტვ პირველის” ოპერატორის, ლექსო ლაშქარავას გარდაცვალების გამო, საპროტესტო და მდუმარე აქციებს საზოგადოების, პოლიტიკისა და მედიასაშუალებების წარმომადგენლები მთელი ქვეყნიდან უერთდებიან.
ამ წუთებში, აქცია იმართება აჭარის ავტონომიური რესპუბლიკის მთავრობის შენობასთან.
აქცია 18:00 საათზე “ტვ პირველის” ოპერატორის, ლექსო ლაშქარავას გარდაცვალების შემდეგ დაიგეგმა.
შენობასთან შეკრებილია პოლიცია. ადგილზე დაპირისპირებაც მოხდა, მოქალაქეები და პოლიტიკოსები ცდილობენ, შენობაზე დაწერონ “მკვლელობა”. აქციის მონაწილეები ასევე სკანდირებენ: “მონა” და “გადადექით”.
დღეს, მდუმარე აქცია გაიმართა გორის ცენტრში. მედიასაშუალების, საზოგადოებისა და პოლიტიკური პარტიების წარმომადგენლებმა ლექსო ლაშქარავას ოჯახისა და ახლობლების მიმართ სამძიმარი გამოხატეს და ასევე , 5 ივლისის აქციაზე დაშავებულ ჟურნალისტებს, ფოტორეპორტიორებსა და ოპერატორებს სოლიდარობა გამოუცხადეს.
მდუმარე აქცია გაიმართა რუსთავშიც, ზვიად გამსახურდიას სახელობის სკვერშიც. სხვადასხვა მედიასაშუალების წარმომადგენლებმა 5 ივლისს რუსთაველის გამზირზე ჟურნალისტების მიმართ ძალადობა დაგმეს და დღეს გარდაცვლილი ოპერატორის, ლექსო ლაშქარავას ოჯახს მიუსამძიმრეს. აქციის მონაწილეებმა ასევე 5 ივლისს თბილისში გამართულ აქციაზე დაშავებულ ჟურნალისტებსა და ოპერატორებს სოლიდარობა გამოუცხადეს.
აქციის მონაწილეები აცხადებენ, რომ ძალადობას გმობენ და ფაქტის დროულ გამოძიებას მოითხოვენ.
სოლიდარობის აქცია გაიმართა თელავშიც. “როცა სიტყვები უკვე ზედმეტია” – ამ სახელწოდების აქციაზე კახეთში მომუშავე ჟურნალისტები შეიკრიბნენ და “ტვ პირველის” ოპერატორის დაცვალების გამო, ოჯახის და კოლეგების მიმართ სოლიდარობა გამოხატეს.
ფოტოები: IPN