კატალონიაში ავტომობილებისთვის „ჭკვიან“ საგზაო ნიშნებს დაამონტაჟებენ. ეს ნიშნები, გზაზე ველოსიპედისტის გამოჩენისას, სიჩქარის ლიმიტს ავტომატურად შეამცირებენ. ამ გზით ესპანურ რეგიონში საგზაო-სატრანსპორტო შემთხვევების შემცირება სურთ, რადგან როგორც წესი, ველოსიპედისტები ავარიებში ყველაზე მეტად ზარალდებიან ხოლმე.
„ჭკვიან“ ნიშნებს კატალონიის ქალაქების ყველაზე პოპულარულ გზებზე დადგამენ და მათ ელექტრონული ტაბლოს ვიზუალი ექნებათ.
ჯერ-ჯერობით სისტემა სატესტო რეჟიმში იმუშავებს და თუკი საგზაო შემთხვევების რაოდენობა მართლაც შემცირდება, მას სამუდამოდ დატოვებენ.
შეგახსენებთ, რომ ევროკავშირის გეგმის მიხედვით 2030 წლისთვის გზებზე სიკვდილიანობის მაჩვენებელი 0-მდე უნდა შემცირდეს. ამისთვის ევროპა მრავალრიცხოვანი პროგრამების განხორციელებას გეგმავს.