,,გრემის” 25-გზის ლაურეატმა, ლეგენდარულმა მუსიკოსმა, სტივი უანდერმა საკულტო ალბომის – Songs in the Key of Life გამოსვლიდან 50 წლის იუბილესთან დაკავშირებით, მსოფლიო ტურნე დააანონსა. 1976 წელს გამოშვებული ორმაგი ალბომი მუსიკის ისტორიაში ერთ-ერთ ყველაზე გავლენიან ნამუშევრადაა აღიარებული.
ტურნე სტარტს მიმდინარე წლის 13 ოქტომბერს, ბირმინგემში აიღებს. შემოდგომის განმავლობაში მომღერალი ეწვევა ასევე ისეთ დიდ ევროპულ ქალაქებს, როგორებიცაა: პარიზი, კოპენჰაგენი, ოსლო, სტოკჰოლმი, ამსტერდამი და დუბლინი, შემდეგ კი კვლავ ბრიტანეთს დაუბრუნდება და კონცერტებს, ლონდონსა და მანჩესტერში გამართავს.
19 ნოემბრიდან პროექტი ამერიკის შეერთებულ შტატებში გადაინაცვლებს, სადაც პერფორმანსები ნიუ-იორკში, ჩიკაგოში, ვაშინგტონსა და დეტროიტში ჩატარდება. ტურნეს გრანდიოზული ფინალი 19 დეკემბერს, ლოს-ანჯელესში შედგება.
უნიკალურია ის ფაქტი, რომ 76 წლის მუსიკოსი ყველა შოუზე 17-ტრეკიან ალბომს თავიდან ბოლომდე, ცოცხლად შეასრულებს. კონცერტებზე გაჟღერდება უკვდავი ჰიტები, მათ შორის: Isn’t She Lovely, I Wish, Sir Duke და As.
მუსიკალური კრიტიკოსები ამ მოვლენას ისტორიულს უწოდებენ, რადგან ალბომმა თავის დროზე სტივი უანდერს რიგით მესამე ,,გრემი” მოუტანა „წლის ალბომის“ ნომინაციაში, გაიყიდა 10 მილიონზე მეტი ასლი და შეყვანილია აშშ-ის კონგრესის ბიბლიოთეკის ეროვნულ აუდიო-ჩანაწერების რეესტრში.