ჯეი-ზიმ ლონდონში გამართული სოლო კონცერტი ემოციურ საოჯახო დღესასწაულად აქცია. რეპერმა შოუ სპეციალურად შეაჩერა, რათა სტადიონზე შეკრებილ მრავალათასიან აუდიტორიასთან ერთად მეუღლისთვის, ბიონსესთვის 45 წლის იუბილე მიელოცა.
მომენტი, რომელიც სოციალურ ქსელებში მალევე ვირუსულად იქცა, 4 სექტემბერს, Tottenham Hotspur Stadium-ზე გამართულ კონცერტზე მოხდა.
ჯეი-ზიმ მიკროფონით მიმართა მსმენელს და ყველას სთხოვა, მასთან ერთად შეესრულებინათ ტრადიციული დაბადების დღის სიმღერა – Happy Birthday.
ამ დროს თავად ბიონსე, რომელიც ქმრის შოუს VIP ლოჟიდან ადევნებდა თვალს, სტადიონის გიგანტურ ეკრანებზე გამოჩნდა. მომღერალი, რომელსაც სპორტული ჰუდი ეცვა, მოულოდნელი სიურპრიზისგან ემოციებს ვერ მალავდა. იგი ფანებს ღიმილით უქნევდა ხელს და ჰაეროვან კოცნებს უგზავნიდა, პარალელურად კი სტადიონის თავზე გრანდიოზული ფეიერვერკი გაუშვეს.
აღსანიშნავია, რომ ბიონსეს იუბილე დაემთხვა მისი საკულტო ალბომის, B’Day გამოსვლიდან მე-20 წლისთავსაც. ბიონსემ იმავე დღეს ალბომის სპეციალური, გაფართოებული ვერსია გამოუშვა. საიუბილეო გამოცემა ციფრულ პლატფორმებზე ვრცელი, 27-ტრეკიანი კომპოზიციის სახით გამოჩნდა. იგი მოიცავს ორიგინალური ჰიტების რემასტერინგს, ასევე უცნობ, ახალ და სპეციალურად ამ დღისთვის მომზადებულ სიმღერებს.
თავის მხრივ, ჯეი-ზის ლონდონში გამართული კონცერტი, რეპერის მუსიკალური მოღვაწეობის 30 წლის იუბილესა და ორი საკულტო ალბომის – Reasonable Doubt და The Blueprint გამოსვლიდან 30-ე და 25-ე საიუბილეო თარიღებთან დაკავშირებული კონცერტების სერიის ნაწილი გახლდათ.
საღამო სხვა სიურპრიზებითაც იყო დატვირთული — სცენაზე მოულოდნელად გამოვიდა ლეგენდარული ჯგუფი, The Fugees ლორინ ჰილისა და უაიკლეფ ჟანის შემადგენლობით, რამაც ლონდონელი ფანები კიდევ უფრო აღაფრთოვანა.
ჯეი-ზის მომავალი პერფორმანსები პარიზსა და ლოს-ანჯელესშია დაგეგმილი. კონცერტი პარიზში 10 სექტემბერს, ხოლო ლოს-ანჯელესში – 23 ოქტომბერს ჩატარდება.
