გადაცემას ”კანონის ფარგლებში” შინაგან საქმეთა სამინისტროს სპორტული კლუბის MIA Force-ის ავტომრბოლელი დათა ქაჯაია ესტუმრა. დათა შსს-ს საგზაო მოძრაობის უსაფრთხოების პროგრამის სახე გახლავთ.
თქვენ ხართ პირველი ქართველი, რომელმაც მონაწილეობა მიიღო მსოფლიოს ჩემპიონატზე ძარიან ავტომობილებში…
შარშან პირველად მივიღე მონაწილეობა და სირთულეებით იყო სავსე. დავაგროვეთ დიდი გამოცდილება, ვასპარეზობდი ”ფოლკსვაგენის” მარკის ავტომობილით, რომელიც გერმანულ გუნდს ეკუთვნოდა და ეს ავტომობილი მათთვისაც რეალურად სატესტო რეჟიმში გამოდიოდა. იყო არაერთი ტექნიკური გაუმართაობა, ორჯერ საწვავიც კი გამითავდა – ერთხელ საკვალიფიკაციო გარბენის დროს და ერთხელ ვარჯიშის დროს. ტექნიკოსები ცდილობენ ზუსტად ზუსტად იმდენი საწვავი ჩაასხან, რამდენიც საჭიროა, რომ წონა ნაკლები იყოს. ახლა კურიოზულად მახსენდება, მაგრამ რეალურად ასეთი ფაქტი ნერვებზე ძალიან მოქმედებს. შარშან 11 ეტაპისგან შედგებოდა რბოლა და 11 ავტოდრომიდან 10 უცნობი იყო. წელს ათი ეტაპია და აქედან შვიდი ავტოდრომი ჩემთვის უკვე ნაცნობია, რაც ნიშნავს იმას, რომ რეალურად ყველა მრბოლელი ვიმახსოვრებთ მოსახვევებს. სულ ორი ნახევარ საათიანი ვარჯიში გვაქვს, რომლის დროსაც ხდება როგორც ავტოდრომის გაცნობა, ისე ავტომობილის პარამეტრების შესწავლა. როდესაც ავტოდრომი ნაცნობია, მთელს დროს ავტომობილის პარამეტრების გაცნობას ანდომებ.
როგორც უკვე ცნობილია, 2 აპრილს საერთაშორისო ჩემპიონატი TCR international გაიმართება საქართველოში, რომელშიც თქვენც ასპარეზობთ. როგორ მიდის მზადების პროცესი?
2 აპრილს, რუსთავის საერთაშორისო ავტოდრომზე გაიმართება საერთაშორისო ჩემპიონატი წრიულ რბოლაში. ეს იქნება გრანდიოზული შეჯიბრი, ასეთი რამ საქართველოში არ მომხდარა, ეს არის მსოფლიო ჩემპიონატის გახსნითი ეტაპი. საქართველომ ორგანიზატორებთან მეგობრული ურთიერთობის დამყარება მოახერხა, ქართულმა სტუმარ-მასპინძლობამაც თავისი ქნა. შსს ყველაფერს აკეთებს იმისთვის, რომ ღონისძიებამ უმაღლეს დონეზე ჩაიაროს. გახსნაზე და დახურვაზე საქართველოს ეტაპებზე 5-6000 ადამიანი ესწრება ხოლმე. მაყურებელი 2 აპრილს არ მოიწყენს, შუალედებში იქნება სხვადასხვა გასართობი ღონისძიება. მალე ბილეთების გაყიდვაც დაიწყება.
როგორც ვიცი, თქვენ ავტომობილიც შეიცვალეთ. რომელი ავტომობილით იასპარეზებთ ამჯერად და რატომ გახდა აუცილებელი მანქანის შეცვლა?
წელს ჩემი ავტომობილი ”ალფა რომეო” იქნება, ორი კვირის წინ ახლო აღმოსავლეთის TCR-ის ეტაპზე გამოვედი, ეს არის ზამთრის ჩემპიონატის სამი ეტაპი, პირველი ეტაპი გამოვტოვე, რადგან წინადადება “ალფა რომეოსგან” გვიან მივიღე. კმაყოფილი ვარ ამ ავტომობილით, პირველივე შეჯიბრზე მეორე ადგილი დავიკავე. თავად ტექნიკური ჯგუფიც ძალიან მონდომებულია ავტომობილის წარმატებაში. ”ალფა რომეო” შარშან მთელი წელი იღებდა მონაწილეობას და მასაც ბევრი გაუმართაობა ჰქონდა, თუმცა წელს გამოსწორდა ეს ყველაფერი.
ალბათ დიდი პასუხისმგებლობაა, როცა მშობლიურ ავტოდრომზე ასპარეზობ, მზად ხართ ამ ფსიქოლოგიური ბარიერის გადასალახად?
ძალიან ბევრი გულშემატკივარი აღმომაჩნდა, მეც არ ვიცოდი. დიდი პასუხისმგებლობაა საქართველოში მონაწილეობა, ჩემზე ძალიან მოგება არავის უნდა, თუმცა ავტოსპორტში წინასწარ ვერაფერს გათვლი. შეჯიბრამდე 3-4 დღით ადრე ჩამოვა ყველა მრბოლელის ავტომობილი და ყველა ვიქნებით თანაბარ პირობებში, გვექნება ნახევარ საათიანი ორი ვარჯიში, საკვალიფიკაციო გარბენი და ორი რბოლა. შემდეგი ეტაპი ბაჰრეინში იქნება. წელს ათი ეტაპია და მსოფლიოს 15-მდე ქვეყნიდან 30-მდე სპორტსმენი მიიღებს მონაწილეობას. საკმაოდ სახელგანთქმული მრბოლელები იღებენ მონაწილეობას. მე პირადად შარშან პირველად მქონდა მათთან შეხება და ”მბურძგლავდა”… კონტაქტურები არიან, თუმცა რაიმე რჩევის მოცემა მათგან არ ხდება. ქართველები სხვანაირად ვართ ერთამენთთან, თუკი რაიმეს ”მივაგნებთ”, ერთმანეთს ვუზიარებთ…
ავტომობილს თავად აკეთებთ?
ძალიან მოუხერხებელი ხელები მაქვს, ჩემით ვერ ვაკეთებ… მეგობრები სულ ამ თემაზე დამცინიან ხოლმე…
თბილისში მოძრაობისას რომელი მანევრი გაღიზიანებთ ყველაზე მეტად?
რაც უფრო მეტად იცავ წესებს, მით უფრო ”გივლიან” მძღოლები. მაგალითად, შუქნიშანთან რომ დგახარ და წინ რომ ჩაგიხტება ვიღაც, ან საცობში რომ დგახარ პატიოსნად და მესამე-მეოთხე ზოლიდან, გადაგივლიან და წინ ჩაგიდგებიან. საჭესთან ვცდილობ ხოლმე აგრესიული არ ვიყო და ჩემში ჩავკლა.
თქვენს ვაჟს თუ მოსწონს თქვენი საქმიანობა?
ჩემი შვილი მთხოვს კარტინგზე ვატარო, მასაც ავტოსპორტსმენობა სურს მამასავით და თუ ნიჭი აღმოაჩნდება, აუცილებლად წავიყვან ამ გზით… ეს სპორტი მარტო ავტომობილის მართვა არ არის. ეს არის ჯანსღი ცხოვრების წესი. ბავშვი, რომელიც პატარაობიდანვე აცნობიერებს რა შეიძლება მოყვეს გადაჭარბებულ სიჩქარეს, არ გადააჭარბებს სიჩქარეს. რუსთავში ახალი კარტოდრომი იხსნება, რომელიც ახალგაზრდებს ხელს შეუწყობს.
ეწევით?
არა.
სვამთ?
არა. ბოლო ხუთი წელია, რაც საერთაშორისო ჩემპიონატებზე ვარ, ახლოსაც არ ვეკარები. ცოტ-ცოტა ალბათ ყველაფერი მენატრება, თუმცა არა ისე, რომ სპორტის გამო ვერ გავძლო. ყველაფერს დავთმობ ავტოსპორტის გამო.
როგორია თქენი სპეციალური სამოსი?
სარბოლო კომბინიზონი ძალიან ცხელია, მის შიგნით გრძელსახელოებიანი საცვლები გვაცვია. სპეციალური ტანსაცმელი მრბოლელს ერთ წუთამდე იცავს ცეცხლისგან, სპეციალური ვარჯიშებიც კი ტარდება რამდენად სწრაფად ამოვა მრბოლელი ავტომობილიდან ცეცხლის გაჩენის შემთხვევაში.
წონაში მომატების უფლება არ გაქვთ?
არა რა თქმა უნდა, ვვარჯიშობთ, ვიკვებებით განსაკუთრეულად, რომ არ გადავაჭარბოთ წონას.
საყვარელი კერძი რომელია?
ამ ბოლო დროს აღარ მაქვს საყვარელი კერძი, ისეთი ცუდი რაღაცეებით ვიკვებები… უფრო სწორად ჯანსაღად ვიკვებები, უმარილო, უშაქარო, უცხიმო… თუმცა უგემურია. მოგონებებიდან კი ყველაზე ძალიან შემწვარი კარტოფილი მენატრება. გემო დავიწყებული მაქვს და ცოტა რომ ვჭამო, უფრო მომინდება. ამ პრინციპით 5 წელია არ მიმიღია შემწვარი კარტოფილი და ძალიან მენატრება.
ვარჯიშობთ?
დიახ, თუმცა ჩვენ ძალით ვარჯიში არ გვჭირდება. მთავარია მრბოლელმა აკეთოს კარდიო ვარჯიშები, რომ სიცხეს გაუძლოს და კონტროლი არ დაკარგოს. აზიის ტურებზე ჩრდილში 50 გრადუსი იყო, ავტომობილში კი ტემპერატურა 80 გრადუსს აღწევდა. ავტომობილს რომ ვაჩერებდით დაახლოებით ხუთი წუთის განმავლობაში ფეხზე ვერ ვდგებოდით, იყო თავბრუსხვევები. სწორედ ამიტომ უნდა იყო ძლიერი, რომ გაუძლო. ყველა სპორტი მსხვერპლს მოითხოვს.
როდის გახდით საგზაო მოძრაობის უსაფრთხოების პროგრამის სახე?
საგზაო მოძრაობის უსაფრთხოების პროგრამის სახე შარშან გავხდი, ჩემი ცნობადობა მას შემდეგ ძალიან გგაიზარდა, თაყვანისმცემლებიც მომრავლდნენ. ვცდილობ, ყველას ჩემით მაგალითი მივცე, როგორ არ უნდა დაარღვიონ ქალაქში მოძრაობის წესები და ამავდროულად ძალიან სწრაფები იყვნენ ავტოდრომზე
რა მარკის ავტომობილი გყავთ?
ამჟამად BMW M3 მყავს. 4.0 ძრავით. “პორშე” და BMW ჩემი საყვარელი ბრენდებია. BMW-ს ისეთი ავტომობილები აქვს, რომელიც ყველგან გამოგადგება, მაგალითად სპორტული მოდელი თავისუფლად შეიძლება გამოგადგეს ოჯახისთვის, საქმიან შეხვედრაზე არ შეგრცხვება მისით მისვლა და არც ავტოდრომზე იქნება სხვა ავტომობილებზე ნაკლები.
შარშანდელი ჩემპიონი თუ ასპარეზობს კვლავ და ზოგადად რამდენი სპორტსმენს იხილავს ქართველი გულშემატკივარი ავტოდრომზე?
შარშან უკვე მეორედ შვეიცარიელი სტეფანო კომინი გახდა გამარჯვებული, ის წელსაც გამოდის და იმავე ავტომობილით, ”ფოლკსვაგენის” მოდელით იასპარეზებს. ავტოსპორტში დიდი მნიშვნელობა აქვს გამართლებას. ძალიან ბევრი ძლიერი მრბოლელი მონაწილეობდა, თუმცა ტექნიკური მიზეზების გამო ვერ გახდნენ ლიდერები.
რომელი მრბოლელი მოგწონთ?
თავგადაკლული არავისზე არ ვარ, თუმცა ”ფორმულა ერთიდან” ფერნანდო ალონსოს მართვის სტილი მომწონს.
ჩვენი მსმენელებისთვის საინტერესო იქნება, როდის დაინტერესდით ავტოსპორტით და რა გზა გაიარეთ ტისიარამდე?
უკვე დიდი ვიყავი, მანამდე არ ვიცოდი, რომ არსებობდა რუსთავის ავტოდრომი. 20-21 წლის ასაკში დავიწყე სამოყვარულო შეჯიბრებებში მიონაწილეობა. ჩემმა მეგობარმა დამაკვალიანა და რუსთავის ავტოდრომზე ჩემი ავტომობილით მივედი. პირველივე შეჯიბრის შემდეგ ”მოვიწამლე” და მას შემდეგ ამ სპორტში ვარ.
რამდენი წლის ხართ და რა ასაკამდეა შესაძლებელი რბოლა?
ახლა 33 წლის ვარ. მაგალითად არის ერთი მრბოლელი, გაბრიელ ტარკვინი, რომელიც ბავშვობიდან მახსოვს, არის მსოფლიო ჩემპიონატის სტაბილური მონაწილე, ახლა 53 წლის არის და ახლაც მოქმედი მრბოლელია.
შინაგან საქმეთა სამინისტროს კლუბზეც რომ გვიამბოთ, თქვენს გარდა ვინ არის კლუბის წევრი?
”მია ფორსი” ოთხი მოქმედი მრბოლელისგან შედგება და ისინი სხვადასხვა კლასებში სტაბილურად მონაწილეობენ. მთლიანობაში საკმაოდ წარმატებული კლუბი გვაქვს.
ზოგადად ქართული ავტოსპორტის მომავალს როგორ ხედავთ? გვყავს ნიჭიერი ავტომრბოლელები?
ინტერესი ძალიან დიდია, მაგრამ კერძო სექტორის ჩართულობაა საჭირო, რადგან ეს სპორტი სპონსორის გარეშე ვერ ცოცხლობს – ავტოსპორტი ძვირიანი სპორტია. სამომავლოდ იმედი მაქვს მეტი ხელშეწყობა ექნებათ ახალგაზრდებს.
დათა, თქვენ საგზაო მოძრაობის უსაფრთხოების პროგრამის სახე ხართ, რას მოიცავს ეს პროგრამა და რა მნიშვნელობისაა საზოგადოებისთვის?
პროგრამა საზოგადოებისთვის ძალიან მნიშვნელოვანია. კამპანია საზოგადოებაში ცნობიერების ამაღლებას უწყობს ხელს, ვცდილობთ საგზაო უსაფრთხოების წესების დაცვა ყველა მოქალაქისთვის მნიშვნელოვანი იყოს. ვიმედოვნებ, უფრო და უფრო გამოიტანს ეს კამპანია შედეგებს.
გადაცემის ჩანაწერი