ევროკავშირში ძაღლებისა და კატების კეთილდღეობის დაცვის პირველი საერთო ევროპული წესები საბოლოოდ დაამტკიცეს. ახალი რეგულაციები პირველად ადგენს ერთიან მინიმალურ სტანდარტებს ცხოველების მოშენების, მოვლისა და გაყიდვისთვის, ვრცელდება როგორც კომერციულ საშენებზე, თავშესაფრებსა და ცხოველების მაღაზიებზე, ისე ონლაინ ვაჭრობაზე.
ახალი წესები კრძალავს ცხოველებისთვის რიგ სასტიკ პრაქტიკას. მათ შორისაა ყურებისა და კუდის კოსმეტიკური მიზნით მოკვეთა, კლანჭების მოცილება, ელექტრო საყელოების გამოყენება, ასევე ცხოველების მუდმივად დაბმულ მდგომარეობაში ყოლა. მიზანია ისეთი პრაქტიკის შეზღუდვა, რომელიც ცხოველის ჯანმრთელობასა და კეთილდღეობას საფრთხეს უქმნის.
განსაკუთრებული ყურადღება ეთმობა ძაღლებისა და კატების მოშენებასაც. ახალი მოთხოვნები სელექციონერებს ავალდებულებს, უპირატესობა მიანიჭონ ჯანმრთელ ფიზიოლოგიურ მახასიათებლებს და არ გაამრავლონ ცხოველები ისეთი ექსტრემალური გარეგნული ნიშნებით, რომლებიც სუნთქვის, ხერხემლის ან სხვა ჯანმრთელობის პრობლემებს იწვევს. ასევე მკაცრდება მოთხოვნები ახლო ნათესაური შეჯვარების მიმართ.
ცვლილებები შეეხება ცხოველების მაღაზიებს, თავშესაფრებსა და საშენებსაც. მათთვის განისაზღვრება ვოლიერების შესაბამისი ზომები, ცხოველებისთვის ბუნებრივი განათების ხელმისაწვდომობა და თანამშრომლების სპეციალური მომზადების მოთხოვნა. ამ გზით ევროკავშირი ცდილობს, ცხოველების მოვლის პირობები სხვადასხვა ქვეყანაში ერთმანეთთან უფრო მეტად დააახლოოს.
ერთ-ერთი მნიშვნელოვანი მიმართულება ონლაინ ვაჭრობის კონტროლიცაა. ცხოველების გაყიდვის შესახებ ონლაინ განცხადებებზე უფრო მკაცრი კონტროლი დაწესდება, ხოლო გამყიდველებს ცხოველის რეგისტრაციის დამადასტურებელი ინფორმაციის წარმოდგენა მოუწევთ. მიზანი უკანონო ვაჭრობის, კონტრაბანდისა და ჯანმრთელობის პრობლემების მქონე ცხოველების გაყიდვის შემცირებაა.
ახალი წესები ასევე ითვალისწინებს ძაღლებისა და კატების მიკროჩიპირებისა და რეგისტრაციის ერთიანი სისტემის შექმნას. ეროვნული მონაცემთა ბაზები ერთმანეთთან უნდა იყოს დაკავშირებული, რათა ცხოველის წარმომავლობისა და მფლობელის დადგენა უფრო მარტივი გახდეს. კომერციულ გამრავლებასა და თავშესაფრებს ახალი მოთხოვნების დასაკმაყოფილებლად ოთხწლიანი გარდამავალი პერიოდი ექნებათ.
