Jaguar-მა ოფიციალურად წარადგინა ახალი Type 01 – სრულად ელექტრო ოთხკარიანი გრანდ-ტურერი, რომელიც ბრენდის ისტორიაში ყველაზე მძლავრ და აეროდინამიკურ საგზაო ავტომობილად იქცა. მოდელის მსოფლიო პრემიერა ნიუ-იორკში გაიმართა და სწორედ Type 01-ით იწყება Jaguar-ის ახალი ელექტრული ეპოქა.
ავტომობილი აღჭურვილია სამი ელექტროძრავით და სრულამძრავიანი სისტემით. მათი ჯამური სიმძლავრე 1030 PS-ს აღწევს, მაქსიმალური ბრუნვის მომენტი კი 1365 ნმ-ია. შედეგად, Type 01 0-დან 100 კმ/სთ-მდე დაახლოებით 3,2 წამში აჩქარდება.
Type 01-ის საფუძველი სპეციალურად Jaguar-ის ელექტრო მოდელებისთვის შექმნილი JEA პლატფორმაა. ავტომობილს 850 ვოლტიანი ელექტრო არქიტექტურა აქვს, ხოლო ბატარეის მოცულობა დაახლოებით 120 კვტ·სთ-ს შეადგენს. Jaguar-ის ინფორმაციით, EPA ციკლით სავალი მარაგი 400 მილს, ანუ დაახლოებით 640 კილომეტრს, აღემატება.
სწრაფი დამუხტვის შემთხვევაში ელექტრომობილი 350 კილოვატიან სადგურზე 13 წუთში დაახლოებით 200 მილის, ანუ 320 კილომეტრის, სავალ მარაგს დაიმატებს. სრული დამუხტვისთვის საჭირო დრო კომპანიას ჯერ არ დაუსახელებია.
Type 01-ის დიზაინი მნიშვნელოვნად განსხვავდება Jaguar-ის დღევანდელი მოდელებისგან. ავტომობილს აქვს ძალიან გრძელი კაპოტი, დაბალი სახურავი, მასიური უკანა ნაწილი და 23 დუიმიანი ბორბლები. კონცეპტ Type 00-თან შედარებით სერიულმა ვერსიამ ძირითადი ფორმები შეინარჩუნა, თუმცა მას დამატებითი ორი კარი დაემატა.
სალონში მთავარი ელემენტი 24 დუიმიანი ეკრანია. ინტერიერი მინიმალისტურ სტილშია შესრულებული და ტექნოლოგიური სისტემების დიდი ნაწილი ცენტრალურ ეკრანზეა თავმოყრილი. Jaguar-ი ასევე იყენებს Nvidia-ს ტექნოლოგიურ არქიტექტურას და ავტომობილი პროგრამული განახლებების მიღებას „ჰაერიდან“ შეძლებს.
