ევროკავშირში ახალი წესები ამოქმედდა, რომლებიც საკვებთან შეხებაში მყოფ შეფუთვაში PFAS-ის, ე.წ. „სამუდამო ქიმიკატების“, გამოყენებას ზღუდავს. შეზღუდვა შეეხო მათ შორის პიცის ყუთებს, საცხობ ქაღალდს, საკვების წასაღებ კონტეინერებსა და მიკროტალღური ბატი-ბუტის შეფუთვას.
PFAS-ის ჯგუფში ათასობით სინთეზური ქიმიური ნივთიერება შედის, რომელიც გარემოში ძალიან ნელა იშლება. ეს ნივთიერებები შეფუთვის წარმოებაში წყალგაუმტარი და ცხიმისადმი მდგრადი თვისებების გამო გამოიყენებოდა.
ევროკომისიის ახალი რეგულაციის მიხედვით, 2026 წლის 12 აგვისტოდან ევროკავშირის ბაზარზე აღარ შეიძლება ისეთი შეფუთვის განთავსება, რომელიც PFAS-ს დადგენილ ზღვარზე მეტი რაოდენობით შეიცავს. ეს იმას ნიშნავს, რომ პიცის ყუთებისა და საცხობი ქაღალდის აკრძალვა თავისთავად არ მომხდარა – მწარმოებლებმა უნდა გამოიყენონ შესაბამისი, უსაფრთხო ალტერნატივები.
PFAS-ის გამოყენება განსაკუთრებით გავრცელებული იყო ცხიმიან საკვებთან დაკავშირებულ შეფუთვაში. სწორედ ამიტომ ახალი მოთხოვნები შეეხება სწრაფი კვების შეფუთვებს, საკვების წასაღებ კონტეინერებსა და სხვა მასალებს, რომლებიც საკვებთან პირდაპირ კონტაქტშია.
ეს ცვლილება ევროკავშირის შეფუთვისა და შეფუთვის ნარჩენების რეგულაციის (PPWR) ნაწილია. რეგულაცია ეტაპობრივად ცვლის შეფუთვის წესებს და მისი მიზანია ნარჩენების შემცირება, გადამუშავების გაზრდა და შეფუთვის უფრო უსაფრთხო მასალებზე გადასვლა.
ევროკავშირი ასევე გეგმავს, რომ 2030 წლიდან ყველა შეფუთვა გადამუშავებადი იყოს, ხოლო გარკვეული ერთჯერადი შეფუთვები, მათ შორის მცირე ზომის სოუსის პაკეტები და სასტუმროებში გამოყენებული მინი-შამპუნის ბოთლები, გარკვეულ შემთხვევებში აიკრძალოს, თუ მათ უფრო მდგრადი ალტერნატივა ექნებათ.
ამრიგად, ევროკავშირის ახალი რეგულაცია პიცის ყუთებისა და საცხობი ქაღალდის გაუქმებას კი არა, მათში კონკრეტული ქიმიური ნივთიერებების გამოყენების შეზღუდვას ითვალისწინებს.
