ევროპაში ქარის ენერგეტიკის განვითარებამ 2026 წლის პირველ ნახევარში რეკორდულ ტემპს მიაღწია. ექვს თვეში რეგიონში 8.8 გიგავატი სიმძლავრის ახალი სადგურები დამონტაჟდა, რაც გასული წლის იმავე პერიოდთან შედარებით 30%-იანი ზრდაა.
WindEurope-ის მონაცემებით, ქარის ახალი ტურბინების მიერ გამომუშავებული ელექტროენერგია დაახლოებით 7 მილიონი ევროპული შინამეურნეობის დასაკმაყოფილებლად იქნება საკმარისი. ორგანიზაცია მიიჩნევს, რომ არსებული ტემპის შენარჩუნების შემთხვევაში 2026 წელი ევროპისთვის ქარის ენერგეტიკის რეკორდული წელი გახდება.
ახალი სიმძლავრეების ყველაზე დიდი ნაწილი გერმანიაზე მოდის – ქვეყანამ წლის პირველ ექვს თვეში 3.4 გიგავატი ქარის ენერგიის სიმძლავრე დაამატა. მნიშვნელოვანი ზრდა დაფიქსირდა ასევე დანიაში, პოლონეთში, პორტუგალიასა და საფრანგეთში. ამასთან, უკრაინამ, მიუხედავად მიმდინარე ომისა, 400 მეგავატზე მეტი ახალი სიმძლავრე დაამატა.
ქარის ენერგეტიკის სექტორში ინვესტიციებიც იზრდება. მხოლოდ 2026 წლის პირველ ნახევარში ევროპაში ქარის ახალი ელექტროსადგურების პროექტებში დაახლოებით 9 მილიარდი ევრო ჩაიდო. ამავე პერიოდში ევროპის ქვეყნებმა აუქციონებზე 17 გიგავატზე მეტი ქარის ენერგიის სიმძლავრე გაანაწილეს, ხოლო წლის მეორე ნახევარში კიდევ 26 გიგავატის პროექტების ტენდერებია დაგეგმილი.
WindEurope-ის პროგნოზით, 2026 წლის ბოლოსთვის ევროპაში შესაძლოა დამატებით 24 გიგავატი ქარის გენერაციის სიმძლავრე დამონტაჟდეს. ეს შედეგი სექტორისთვის მნიშვნელოვანი ნაბიჯი იქნება, რადგან ევროპა ცდილობს 2030-იან წლებში ყოველწლიურად დაახლოებით 30 გიგავატი ქარის ახალი სიმძლავრე დაამატოს.
ქარის ენერგიის სწრაფი განვითარება ევროპის ენერგეტიკული უსაფრთხოებისთვისაც მნიშვნელოვანია. ახალი ტურბინების მიერ გამომუშავებული ელექტროენერგია ხელს უწყობს წიაღისეული საწვავის იმპორტის შემცირებას და ენერგეტიკული სისტემის უფრო მეტად განახლებად წყაროებზე გადასვლას. WindEurope-ის შეფასებით, მხოლოდ 2026 წლის პირველ ნახევარში დამონტაჟებული სიმძლავრე წელიწადში დაახლოებით 25 LNG ტანკერის მოცულობის იმპორტირებული საწვავის ჩანაცვლების შესაძლებლობას ქმნის.
