56 წლის ასაკში გარდაიცვალა ფრანგი ჟურნალისტი და ბლოგერი, ნატაშა რეი. ის ცნობილი გახდა იმ ხმაურიანი განცხადებებით, რომლის მიხედვითაც, თითქოს საფრანგეთის პირველი ლედი, ბრიჯიტ მაკრონი მამაკაცი იყო. ეს სკანდალური თეორია რეისა და ბლოგერ, ამანდინ რუას მიერ 2021 წელს გავრცელდა.
რეის ადვოკატის განცხადებით, ბლოგერი 13 სექტემბერს, ხანგრძლივი ავადმყოფობის შემდეგ გარდაიცვალა. მისი გარდაცვალების დღესვე ადვოკატმა განაცხადა, რომ რეიმ ბრიჯიტ მაკრონისა და მისი ოჯახის წინააღმდეგ მიმდინარე „ცილისწამების საქმეში“ საბოლოო სამართლებრივ გამარჯვებას მიაღწია.
საქმე რამდენიმე წლის განმავლობაში გრძელდებოდა. 2024 წლის სექტემბერში პარიზის სასამართლომ რეი და ამანდინ რუა ცილისწამებაში დამნაშავედ ცნო, თუმცა 2025 წლის ივლისში პარიზის სააპელაციო სასამართლომ ისინი გაამართლა.
