General Motors-ის აღმასრულებელმა დირექტორმა მერი ბარამ 2025 წელს 48,2 მილიონი დოლარის ანაზღაურება მიიღო. Automotive News-ისა და Equilar-ის კვლევის მიხედვით, ეს მაჩვენებელი 2024 წელთან შედარებით 61,7%-ით გაიზარდა.
თუ ამ თანხას აშშ-ში სტანდარტული სამუშაო გრაფიკის მიხედვით საათებზე გადავანაწილებთ, გამოდის, რომ ბარას შემოსავალი საათში დაახლოებით 24 ათას დოლარს შეადგენდა. სწორედ ამიტომ შეიძლება ითქვას, GM-ის ხელმძღვანელი დაახლოებით იმ თანხას გამოიმუშავებდა ერთ საათში, რამდენიც აშშ-ში ახალი ავტომობილის შესაძენად არის საჭირო.
თუმცა, 48,2 მილიონი დოლარი არ წარმოადგენს მხოლოდ ბარას საბაზისო ხელფასს. ეს არის ე.წ. „რეალიზებული ანაზღაურება“, რომელშიც შედის ხელფასი, ბონუსები და აქციებთან დაკავშირებული შემოსავალი, მათ შორის აქციებისა და ოფციონების რეალურად მიღებული ღირებულება. სწორედ ამიტომ ეს თანხა განსხვავდება იმ მაჩვენებლისგან, რომელსაც General Motors ოფიციალურ ანგარიშებში აქვეყნებს.
GM-ის SEC-ისთვის წარდგენილი დოკუმენტების მიხედვით, ბარას 2025 წლის სრული კომპენსაცია 29,9 მილიონი დოლარი იყო. აქედან 2,1 მილიონი დოლარი საბაზისო ხელფასი, 21,6 მილიონი დოლარი აქციების ჯილდო, ხოლო 4,96 მილიონი დოლარი წლიური სტიმულირების პროგრამით მიღებული თანხა იყო.
ბარას შემოსავლის ზრდა განსაკუთრებით თვალსაჩინოა იმის ფონზე, რომ General Motors-ის მოგება 2025 წელს მნიშვნელოვნად შემცირდა. კომპანიის წლიურმა მოგებამ 2,7 მილიარდი დოლარი შეადგინა, მაშინ როცა 2024 წელს ეს მაჩვენებელი 6 მილიარდი დოლარი იყო.
ამერიკული ავტომწარმოებლების ხელმძღვანელებს შორის ბარას შემდეგ Ford-ის გენერალური დირექტორი ჯიმ ფარლი მოდის, რომლის 2025 წლის ანაზღაურებამ 16,7 მილიონი დოლარი შეადგინა. მესამე ადგილზე Rivian-ის ხელმძღვანელი რ. ჯ. სკარინჯია 12,4 მილიონი დოლარით.
ამავე კვლევის მიხედვით, ავტომობილების ინდუსტრიასა და მასთან დაკავშირებულ კომპანიებში ყველაზე მაღალი ანაზღაურება Nvidia-ს ხელმძღვანელს, ჯენსენ ჰუანგს ჰქონდა – 2025 წელს მისი რეალიზებული კომპენსაცია 152,9 მილიონ დოლარს შეადგენდა.
