Tesla-მ Full Self-Driving-ის 14.3.9 ვერსია გამოუშვა, რომელსაც ავარიის თავიდან ასაცილებლად ავტომატურად მოქმედების ახალი ფუნქცია დაემატა. ყველაზე მნიშვნელოვანი სიახლე ის არის, რომ სისტემას შეუძლია მანქანის მართვაში ჩაერიოს მაშინაც კი, როდესაც მძღოლი ავტომობილს თავად მართავს და FSD ჩართული არ აქვს.
ახალი ფუნქცია შეჯახების თავიდან ასაცილებლადაა შექმნილი. Tesla-ს განმარტებით, გარკვეულ სიტუაციაში სისტემა თავად ააქტიურებს FSD-ს, რათა საფრთხე აირიდოს და შემდეგ ავტომობილის მართვა კვლავ გააგრძელოს. ეს პირველი შემთხვევაა, როდესაც Tesla-ს ავტომატურ სისტემას ხელით მართვის რეჟიმში მყოფ ავტომობილზე საკუთარი გადაწყვეტილებით კონტროლის აღების შესაძლებლობა მიეცა.
ფუნქცია ერთ-ერთ სცენარში მაშინ აქტიურდება, როდესაც ავტომაგისტრალზე 137 კმ/სთ-მდე სიჩქარით შეჯახების საფრთხე არსებობს და ელექტრონიკა მიიჩნევს, რომ მხოლოდ ავტომატური დამუხრუჭება ავარიის თავიდან ასაცილებლად საკმარისი არ იქნება. ასეთ შემთხვევაში მანქანამ შესაძლოა დაბრკოლების გვერდის ავლა, ზოლიდან ზოლში გადასვლა ან გზის ნაპირზე გადასვლა თავად სცადოს, პარალელურად კი აჩქარებასა და შენელებას აკონტროლებდეს.
თუმცა სისტემა ყველა სიტუაციაში არ გამოიყენება. Tesla-ს ინფორმაციით, ფუნქცია არ ირთვება, როდესაც საფრთხე საპირისპირო მიმართულებით მოძრავ ავტომობილთან შეჯახებას უკავშირდება. ასევე, აღნიშნული რეჟიმი არ გამოიყენება იმ შემთხვევაში, თუ ავტომობილის სიახლოვეს მოტოციკლისტი, ველოსიპედისტი ან ქვეითი იმყოფება.
მეორე სცენარი მძღოლის ყურადღების გაფანტვას ან FSD-ის სავარაუდო შემთხვევით გამორთვას უკავშირდება. ასეთ შემთხვევაში სისტემას 36-დან 137 კმ/სთ-მდე სიჩქარეზე და ნებისმიერი ტიპის გზაზე შეუძლია თავად ჩართოს FSD და გარკვეული პერიოდის განმავლობაში ავტომობილი მისი კონტროლით მართოს. ამ რეჟიმის გამორთვა ჩვეულებრივ შესაძლებელია მუხრუჭის დაჭერით ან საჭის მოტრიალებით.
