Volkswagen-ის ახალი ხელმისაწვდომი ელექტრომობილების მიმართ ევროპაში მოთხოვნა იმდენად მაღალი აღმოჩნდა, რომ ზოგიერთ ბაზარზე მომხმარებლებს ავტომობილის მისაღებად თითქმის ერთი წელი უწევთ ლოდინი. საუბარია კომპანიის ახალ, შედარებით იაფ ელექტრომობილზე, რომლის ფასი დაახლოებით 25 ათასი ევროდან იწყება.
მოდელი ესპანეთში, მარტორელის ქარხანაში იწარმოება და Volkswagen-ის ელექტრომობილების ახალი, უფრო ხელმისაწვდომი ოჯახის ნაწილია. საბაზისო ვერსია 37 კვტ·სთ სიმძლავრის ბატარეით არის აღჭურვილი, რაც ავტომობილის ფასის შემცირებას უწყობს ხელს.
Volkswagen-ისთვის ასეთი ავტომობილები სტრატეგიულად მნიშვნელოვანია, რადგან გერმანული ბრენდი ელექტრომობილების უფრო ფართო აუდიტორიამდე მიყვანას ცდილობს. კომპანია უკვე მუშაობს კიდევ უფრო იაფ მოდელზეც – ID. EVERY1-ზე, რომლის სერიული ვერსიის ფასი დაახლოებით 20 ათასი ევრო უნდა იყოს და ბაზარზე 2027 წელს გამოვიდეს.
მაღალი მოთხოვნა განსაკუთრებით მნიშვნელოვანია იმ ფონზე, როდესაც Volkswagen-ი ბოლო წლებში ელექტრომობილების მიმართულებით ძლიერ კონკურენციას ჩინელი მწარმოებლებისგან აწყდება. ბიუჯეტური მოდელების სწრაფი გაყიდვები კომპანიას საშუალებას აძლევს, ელექტრომობილების სეგმენტში უფრო ფართო ბაზარი დაიკავოს და ძვირად ღირებულ მოდელებზე დამოკიდებულება შეამციროს.
Volkswagen-ის ახალი მიდგომა ასევე წარმოების ხარჯების შემცირებას უკავშირდება.
თუ მოთხოვნა ამ ტემპით გაგრძელდა, Volkswagen-ს ერთ-ერთი მთავარი პრობლემა უკვე საპირისპირო მიმართულებით ექნება – არა მომხმარებლების მოძიება, არამედ საკმარისი რაოდენობის ავტომობილების წარმოება. ხანგრძლივი რიგები კი მიუთითებს, რომ ევროპაში ხელმისაწვდომ ელექტრომობილებზე მოთხოვნა ჯერ კიდევ საკმაოდ მაღალია.
