Kia-მ ევროპულ ბაზარზე ერთდროულად სამი ახალი სპორტული ელექტრომობილი – EV3 GT, EV4 GT და EV5 GT გამოიყვანა. სამივე მოდელმა სტანდარტულ ვერსიებთან შედარებით უფრო მძლავრი ტექნიკა, სრულამძრავიანი სისტემა და სპორტული მართვისთვის გადამუშავებული შასი მიიღო.
Kia EV3 GT და EV4 GT ერთსა და იმავე ტექნიკურ ბაზას იყოფენ. ორივე მოდელს ორი ელექტროძრავი აქვს, რომელთა ჯამური სიმძლავრე 292 ცხენის ძალას აღწევს. EV3 GT 100 კმ/სთ-მდე 5.7 წამში აჩქარდება, EV4 GT კი – 5.6 წამში. მათი სვლის მარაგი WLTP ციკლით დაახლოებით 500 კილომეტრს აღემატება.
უფრო ძლიერი EV5 GT ორი ელექტროძრავით 306 ცხენის ძალას და 480 ნიუტონმეტრს გამოიმუშავებს. 100 კმ/სთ-მდე აჩქარებას 6.2 წამს ანდომებს, ერთი დამუხტვით კი WLTP ციკლით 476 კილომეტრამდე გავლა შეუძლია. სამივე ახალ მოდელში 81.4 კვტ/სთ ტევადობის ბატარეაა გამოყენებული.
GT-ვერსიების მთავარი განსხვავება მხოლოდ სიმძლავრე არ არის. Kia-მ შეცვალა დაკიდების, საჭის, სტაბილიზაციისა და მოჭიდების მართვის სისტემების პარამეტრები. ავტომობილებს ასევე აქვთ ელექტრონულად მართვადი ამორტიზატორები, Launch Control და ბრუნვის ვექტორული განაწილების სისტემა, რაც უფრო დინამიკური მართვისთვის არის გათვლილი.
Kia-მ საბოლოო პარამეტრები ევროპულ გზებზე ჩატარებული ტესტების საფუძველზე შეარჩია. ავტომობილები სხვადასხვა პირობებში გერმანიაში, იტალიაში, ესპანეთში, შვედეთსა და დიდ ბრიტანეთში გამოიცადა. EV5 GT-ს კი გზის ზედაპირის წინასწარი ანალიზის სისტემა აქვს, რომელიც კამერის საშუალებით უსწორმასწორობებს ამჩნევს და დაკიდებას მათთან შეჯახებამდე ამზადებს.
გერმანიაში EV3 GT-ის ფასი 53 990 ევროდან, EV4 GT-ის – 57 840 ევროდან, ხოლო EV5 GT-ის – 59 990 ევროდან იწყება. ამ მოდელებით Kia თავისი ელექტრომობილების სპორტულ ხაზს კიდევ უფრო აფართოებს და GT-ვერსიას უკვე უფრო ფართო სეგმენტებში ავრცელებს.
