„ფორმულა 1“-ის გუნდმა Red Bull Racing-მა მორიგი უჩვეულო ექსპერიმენტი ჩაატარა – გუნდის ბოლიდი მეტროს რელსებზე გაუშვა. სპეციალური შოუსთვის გამოიყენეს Red Bull RB8, რომელიც დროებით სარბოლო მანქანიდან ერთგვარ „ლოკომოტივად“ გადააკეთეს.
ბოლიდს შესაბამისი მოწყობილობა დაუმონტაჟეს, რის შედეგადაც ავტომობილმა მეტროს ლიანდაგზე გადაადგილება შეძლო. პროექტის მიზანი არა პრაქტიკული ტრანსპორტის შექმნა, არამედ Red Bull-ისთვის დამახასიათებელი სანახაობრივი ტრიუკის განხორციელება იყო.
RB8 „ფორმულა 1“-ის ისტორიაში ერთ-ერთი გამორჩეული ბოლიდია. სწორედ ამ მოდელით სებასტიან ფეტელმა 2012 წლის სეზონში მსოფლიოს ჩემპიონის ტიტული მოიპოვა, ხოლო Red Bull-მა კონსტრუქტორთა ჩემპიონატი მოიგო.
მეტროს ინფრასტრუქტურის გამოყენებამ სარბოლო ავტომობილისთვის განსაკუთრებით უჩვეულო სანახაობა შექმნა – ბოლიდი, რომელიც ჩვეულებრივ ასფალტზე ასობით კილომეტრ საათში მოძრაობისთვის არის შექმნილი, ამჯერად რელსებზე აღმოჩნდა.
Red Bull Racing-ს მსგავსი არასტანდარტული პროექტები არაერთხელ განუხორციელებია. გუნდი წლების განმავლობაში იყენებს ფორმულა 1-ის ტექნოლოგიებსა და ავტომობილებს სხვადასხვა სარეკლამო და გასართობი ექსპერიმენტისთვის.
