Nissan-მა ახალი თაობის Skyline-ის პრემიერის თარიღი დაადასტურა. ლეგენდარული იაპონური სედანის მე-14 თაობას კომპანია 2026 წლის დეკემბერში წარადგენს. Nissan-ის აღმასრულებელი დირექტორის, ივან ესპინოსას განცხადებით, ახალი Skyline ბრენდის აღორძინების ერთ-ერთი მნიშვნელოვანი მოდელი იქნება.
ახალი Skyline-ის შესახებ Nissan-მა პირველი ტიზერები 2026 წლის აპრილში გამოაქვეყნა. კადრებიდან ჩანს, რომ ავტომობილის დიზაინში კლასიკური Skyline-ის ელემენტები იქნება გამოყენებული. განსაკუთრებით თვალშისაცემია მრგვალი ფორმები, რელიეფური ფრთები და უკანა ფარების დიზაინი, რომელიც ლეგენდარულ GT-R-ს მოგვაგონებს.
ახალი მოდელის შექმნის პროცესიც განსაკუთრებული აღმოჩნდა. Nissan-ის ინფორმაციით, Skyline-ის განვითარებას მხოლოდ 26 თვე დასჭირდა, მაშინ როდესაც წინა თაობის შექმნის ციკლი დაახლოებით 55 თვე გრძელდებოდა. დროის შესამცირებლად კომპანიამ აქტიურად გამოიყენა ხელოვნური ინტელექტი და ციფრული მოდელირება – დიზაინიდან ინჟინერიასა და ტესტირებამდე.
Nissan-ის ხელმძღვანელმა ასევე აღნიშნა, რომ ავტომწარმოებელმა განვითარების დაჩქარების კუთხით გამოცდილება ჩინეთის ბაზრიდან და პარტნიორებთან, მათ შორის Dongfeng-თან, თანამშრომლობისას მიიღო. ახალი მიდგომა კომპანიის უფრო ფართო რესტრუქტურიზაციისა და ახალი მოდელების სწრაფად შექმნის სტრატეგიის ნაწილია.
ტექნიკური მახასიათებლები Nissan-ს ოფიციალურად ჯერ არ გაუმხელია. გავრცელებული ინფორმაციით, ავტომობილი უკანა წამყვან არქიტექტურას შეინარჩუნებს. ასევე განიხილება ჰიბრიდული ძალოვანი სისტემა და V6 ძრავა, რომლის სიმძლავრემ შესაძლოა 400 ცხენის ძალას გადააჭარბოს. საუბარია ასევე 6-საფეხურიანი მექანიკური გადაცემათა კოლოფის შესაძლო გამოყენებაზე, თუმცა ეს დეტალები ჯერ ოფიციალურად დადასტურებული არ არის.
ახალი Skyline შესაძლოა მომავალში Infiniti-ს ახალი სპორტული სედანის საფუძველიც გახდეს. მსგავსი კავშირი უკვე არსებობდა წინა თაობებში – Skyline-სა და Infiniti Q50-ს შორის. Infiniti-ს ახალი მოდელის გამოჩენა 2027 წლის მეორე ნახევარშია მოსალოდნელი.
Nissan-ისთვის ახალი Skyline მხოლოდ კიდევ ერთი ახალი ავტომობილი არ არის. კომპანია მას საკუთარი ისტორიული სახელის დაბრუნებასა და ბრენდის განახლების სტრატეგიის ერთ-ერთ მთავარ სიმბოლოდ განიხილავს. მოდელის სრული დიზაინი, ძრავები და ტექნიკური მონაცემები ოფიციალურად დეკემბრის პრემიერაზე გახდება ცნობილი.
