Toyota მსოფლიო მასშტაბით საწარმოო ქსელის ავტომატიზაციის დაჩქარებას გეგმავს და მიიჩნევს, რომ კომპანიის, მისი შვილობილი კომპანიებისა და ძირითადი მომწოდებლების ინფრასტრუქტურის მოდერნიზებას დაახლოებით 400 ათასი რობოტი დასჭირდება. პროექტის პოტენციური დაფინანსება 2028 წლიდან წელიწადში დაახლოებით 6,4 მილიარდ დოლარს შეადგენს.
Toyota-ს შეფასებით, საუბარია როგორც ჩვეულებრივ სამრეწველო რობოტებზე, ისე ჰუმანოიდებზე. მათი ნაწილი არსებული დანადგარების ჩანაცვლებისთვის იქნება საჭირო, ნაწილი კი ახალი ავტომატიზებული პროცესებისთვის. რობოტები შეიძლება გამოიყენონ როგორც უშუალოდ წარმოებაში, ისე ლოგისტიკასა და საწყობებში, მათ შორის ადამიანებთან მუშაობისთვის.
მნიშვნელოვანია, რომ 400 ათასი რობოტი მხოლოდ Toyota-ს საკუთრებაში არსებულ ქარხნებს არ ეხება. გავრცელებული შეფასებით, დაახლოებით 150 ათასი რობოტი Toyota-ს საკუთარ საწარმოებში, ხოლო კიდევ დაახლოებით 250 ათასი ჯგუფის სხვა კომპანიებსა და პროგრამაში ჩართულ ობიექტებში შეიძლება განთავსდეს. Toyota-ს გლობალურად დაახლოებით 60 ქარხანა აქვს.
კომპანიის სტრატეგიის ერთ-ერთი საინტერესო მიმართულება რობოტებისთვის გამოცდილი თანამშრომლების ცოდნის გადაცემაა. Toyota ამ მიზნით ავითარებს სისტემებს, რომლებიც რობოტებს ადამიანების მიერ შესრულებული მოქმედებების დემონსტრაციით სწავლის საშუალებას აძლევს. ერთ-ერთი ასეთი მოწყობილობაა ELEY – დაახლოებით 50 კილოგრამის მასის ბორბლებიანი რობოტი, რომელსაც ორი თითის მსგავსი სამუშაო მექანიზმი აქვს.
Toyota-მ ELEY-ის შესაძლებლობები ექსპერიმენტულად უკვე აჩვენა. რობოტმა თანამშრომლებისგან მოძრაობების ათვისების შემდეგ ტანსაცმლის დაკეცვა შეძლო. კომპანია ასევე განიხილავს მიღებული მონაცემების სხვადასხვა ქარხანაში გაზიარებას, რათა კონკრეტული ამოცანის შესწავლა ყველა საწარმოში თავიდან აღარ გახდეს საჭირო.
Toyota-ს ოფიციალური დოკუმენტების მიხედვით, რობოტიკის განვითარება კომპანიისთვის მხოლოდ ადამიანების ჩანაცვლებას არ გულისხმობს. მწარმოებელი საუბრობს ადამიანებისა და რობოტების თანამშრომლობაზე, პროდუქტიულობაზე, ხარისხის გაუმჯობესებასა და სამუშაო გარემოს გამარტივებაზე. ამასთან, Toyota უკვე ატარებს რობოტების საცდელ პროგრამებს დეტალების გადაადგილებისა და კომპლექტაციის მიმართულებით.
მასშტაბური ავტომატიზაციის ერთ-ერთ მთავარ მიზეზად სახელდება მუშახელის დეფიციტი და მოძველებული საწარმოო ინფრასტრუქტურა. თუმცა 400 ათასი რობოტის მაჩვენებელი ამ ეტაპზე შეფასებაა და არა საბოლოოდ დამტკიცებული გეგმა – Toyota-ს არ განუსაზღვრავს ზუსტად რამდენი წლის განმავლობაში გაგრძელდება ინვესტიციები და კონკრეტულად რომელ ქარხნებში რამდენი რობოტი განთავსდება.
თუ გეგმა ამ მასშტაბით განხორციელდა, Toyota-ს საწარმოო სისტემაში რობოტები უფრო აქტიურად შეასრულებენ განმეორებით, ფიზიკურად დატვირთულ და ლოგისტიკურ სამუშაოებს, ხოლო გამოცდილი თანამშრომლების ცოდნის გაზიარება კომპანიას სხვადასხვა ქარხანაში პროცესების სტანდარტიზაციის შესაძლებლობას მისცემს.
