ბრუნეის სამეფო ოჯახისთვის სპეციალური შეკვეთით შექმნილი უნიკალური Ferrari Enzo სექტემბრის ბოლოს დახურულ აუქციონზე გაიყიდება. ავტომობილი RM Sotheby’s-ის Sealed პროგრამის ფარგლებში გასხვისდება და მისი სავარაუდო ფასი ჯერჯერობით არ სახელდება.
ეს Enzo განსაკუთრებულია იმით, რომ მარანელოში სწორედ ეს ეგზემპლარი შეიღება შავ ფერში. სუპერქარი 2004 წლის ოქტომბერში ააწყვეს და მას შემდეგ მხოლოდ 5 763 კილომეტრი აქვს გავლილი. შესაბამისად, ავტომობილის საშუალო წლიური გარბენი დაახლოებით 250 კილომეტრია.
Ferrari Enzo თავდაპირველად ლონდონში ინახებოდა, მოგვიანებით კი აზია-წყნარი ოკეანის რეგიონში გადაიყვანეს. ევროპაში ავტომობილი 2022 წელს დაბრუნდა, რის შემდეგაც მის აღდგენაზე იტალიურმა ატელიემ Carrozzeria Zanasi იმუშავა. სამუშაოების ღირებულებამ დაახლოებით 110 ათასი ევრო შეადგინა.
იმავე წელს Enzo აუქციონზე ახალ მფლობელზე გაიყიდა, თუმცა გარიგების თანხა არ გასაჯაროებულა. საინტერესოა, რომ მას შემდეგ ავტომობილის გარბენი მხოლოდ 33 კილომეტრით გაიზარდა, რაც მისი საკოლექციო სტატუსის კიდევ ერთი მაჩვენებელია.
სუპერქარი აღჭურვილია 6.0 ლიტრიანი ატმოსფერული V12 ძრავით, რომლის სიმძლავრე 660 ცხენის ძალაა. მიუხედავად მცირე გარბენისა, 2024 წელს ავტომობილს შეუცვალეს გადაბმულობა, ორივე საწვავის ტუმბო და ძრავის რამდენიმე სხვა კომპონენტი.
ამ Enzo-ს შესაძლო ღირებულების წარმოდგენას სხვა იშვიათი ეგზემპლარიც იძლევა. აშშ-ის ბაზრისთვის გამოშვებული შავი ფერის მოდელი, რომელსაც 21 353 კილომეტრი ჰქონდა გავლილი, აუქციონზე 10.675 მილიონ დოლარად გაიყიდა. ბრუნეის სამეფო ოჯახის ყოფილი ავტომობილის საბოლოო ფასი შესაძლოა სწორედ მისი უნიკალური ფერის, ისტორიისა და მცირე გარბენის გამო განსაკუთრებით მაღალი იყოს.
