კლიმატის ცვლილება საფრანგეთის სოფლის მეურნეობას ცვლის – ქვეყნის სამხრეთში სულ უფრო მეტი ფერმერი ტრადიციული კულტურების ნაცვლად ტროპიკული ხილის მოყვანას იწყებს. უკვე მოჰყავთ ბანანი, პაპაია, გუავა და პასიფლორა, ზოგიერთ მეურნეობაში კი ექსპერიმენტულად ავოკადოს, კოჭას და სხვა სითბოს მოყვარული კულტურების მოყვანასაც ცდილობენ.
ერთ-ერთი ასეთი ფერმერია იზაბელ პერტუა, რომელიც საფრანგეთის სამხრეთში, სოფლის მეურნეობას ეწევა. მან ტროპიკული ხილის წარმოებაზე გადასვლა მას შემდეგ გადაწყვიტა, რაც 2022 წლის ძლიერმა სიცხემ მისი პომიდვრის, წიწაკისა და ბადრიჯნის მოსავალი პრაქტიკულად მთლიანად გაანადგურა.
ფერმერმა თავდაპირველად ბანანისა და გუავას ხეების დარგვა ექსპერიმენტის სახით დაიწყო, თუმცა შედეგმა მოლოდინს გადააჭარბა. 2025 წელს მან პირველი ბანანისა და პაპაიას მოსავალიც მიიღო. დღეს მისი მეურნეობის დაახლოებით 90% ტროპიკული ხილის წარმოებას უკავია, ხოლო პლანტაციების გაფართოება დამატებით სამ ჰექტარზე იგეგმება.
მის მაგალითს სხვა ფერმერებიც მიჰყვებიან. რეგიონში დაახლოებით 20 მეურნეობა უკვე ექსპერიმენტულად აწარმოებს ეგზოტიკურ ხილს. მათ შორის 12 ფერმერმა სპეციალური გაერთიანებაც შექმნა, რომლის მიზანიც კლიმატის ცვლილებასთან სოფლის მეურნეობის ადაპტაცია და ახალი კულტურების წარმოების განვითარებაა.
ფერმერები ამ მიმართულებით არა მხოლოდ ბანანსა და პაპაიას, არამედ ავოკადოს, კოჭას, არაქისსა და წიწაკასაც ცდიან. სპეციალისტების შეფასებით, საუბარი ჯერ ინდუსტრიული მასშტაბის წარმოებაზე არ არის, თუმცა ახალი კულტურები ფერმერებისთვის დამატებითი შემოსავლის წყაროდ შეიძლება იქცეს და ტრადიციული მოსავლის კლიმატური რისკები ნაწილობრივ დააბალანსოს.
ამ ცვლილების ერთ-ერთი მთავარი მიზეზი გახშირებული სიცხე და გვალვაა. 2026 წლის ზაფხულშიც საფრანგეთის სოფლის მეურნეობა მძიმე კლიმატურ პირობებს შეხვდა – მაღალი ტემპერატურისა და გვალვის გამო სხვადასხვა რეგიონში მოსავლიანობა შემცირდა, დაზიანდა ნათესები და შემცირდა მეცხოველეობისთვის საჭირო საკვების მარაგიც.
ამ ფონზე სამხრეთ საფრანგეთში ფერმერები ცდილობენ კლიმატის ცვლილება მხოლოდ პრობლემად კი არ მიიღონ, არამედ ახალი სასოფლო-სამეურნეო შესაძლებლობებიც გამოიყენონ. ტროპიკული ხილი, რომელიც აქამდე საფრანგეთისთვის ძირითადად იმპორტირებულ პროდუქტს წარმოადგენდა, ქვეყნის ზოგიერთ ნაწილში უკვე ადგილობრივ მოსავლად იქცევა.
