ლიზომ მნიშვნელოვან სამართლებრივ წარმატებას მიაღწია. ფედერალურმა მოსამართლემ, ფერნანდო აენლე-როჩამ საბოლოოდ გააუქმა ყველა დარჩენილი ბრალდება, რომელიც მომღერლის საგასტროლო კომპანიის, Big Grrrl Big Touring Inc. წინააღმდეგ იყო მიმართული.
სარჩელი 2023 წელს შეიტანა ტურის ყოფილმა ასისტენტმა, აშა დანიელსმა. იგი ამტკიცებდა, რომ 2023 წლის ევროპული ტურის მსვლელობისას გახდა რასობრივი და სექსუალური შევიწროების, დისკრიმინაციისა და სახიფათო სამუშაო გარემოს მსხვერპლი. მოსამართლის გადაწყვეტილებით, წარდგენილი მასალები არ აკმაყოფილებდა კანონით გათვალისწინებულ მტკიცებულებათა სტანდარტებს, რის გამოც საქმე ნაფიც მსაჯულებამდე საერთოდ ვერ მივა. თავად ლიზო, როგორც ინდივიდუალური მოპასუხე, ამ საქმიდან ჯერ კიდევ 2024 წელს მოიხსნა.
ლიზოს ადვოკატმა, მელისა გლასმა გადაწყვეტილებას „სრული გამარჯვება“ უწოდა. მომღერალმა კი სოციალურ ქსელში ვიდეომიმართვა გაავრცელა, სადაც აღნიშნა, რომ სიმართლემ გაიმარჯვა. მან ხაზი გაუსვა, რომ ბრალდებები აბსურდული იყო, რადგან დანიელსმა ტურზე 3 კვირაზე ნაკლები იმუშავა და ისინი პირადად არც კი იცნობდნენ ერთმანეთს. არტისტის თქმით, იგი არ აპირებს საქმეების მორიგებით დასრულებას და ბოლომდე იბრძოლებს საკუთარი რეპუტაციისთვის.
ამ წარმატების მიუხედავად, ლიზოსთვის სამართლებრივი დავა სრულად არ დასრულებულა. სასამართლოში კვლავ გრძელდება მეორე, ცალკეული პროცესი, რომელიც მისმა სამმა ყოფილმა მოცეკვავემ წამოიწყო. თუმცა, აღსანიშნავია, რომ ამ საქმეშიც მომღერალმა უკვე მიაღწია ნაწილობრივ წარმატებას — სასამართლომ უკვე გამორიცხა და გააუქმა მის წინააღმდეგ მიმართული წონის დისკრიმინაციის ბრალდებები.
