Apple ახალი iPhone-ის წარდგენისთვის ემზადება და 9 სექტემბრის პრეზენტაცია კომპანიისთვის ბოლო წლების ერთ-ერთ ყველაზე მნიშვნელოვან ღონისძიებად შეიძლება იქცეს. მიზეზი მხოლოდ iPhone 18 Pro-ს ახალი შესაძლებლობები არ არის – კომპანია, გავრცელებული ინფორმაციით, პროდუქციის გამოშვების ტრადიციულ სქემას ცვლის, აქცენტს პრემიუმ მოდელებზე აკეთებს და პირველად წარადგენს დასაკეც iPhone-ს.
Apple-ის ღონისძიება 9 სექტემბერს Apple Park-ში გაიმართება. თავად კომპანიამ ღონისძიების სახელწოდებად „Surprise and shine“ დააანონსა, თუმცა კონკრეტულად ახალი iPhone-ების მახასიათებლები ოფიციალურად ჯერ არ გაუმხელია. Apple-ის ოფიციალურ მასალებში ამ ეტაპზე მთავარი აქცენტი კვლავ Apple Intelligence-სა და ახალ Siri-ზეა.
iPhone 18 წელს შესაძლოა ყველასთვის არ გამოვიდეს
ამ წლის მთავარი ცვლილება სწორედ პროდუქციის სტრატეგიას უკავშირდება. არსებული ინფორმაციით, სექტემბერში Apple-ის მთავარი სიახლეები იქნება iPhone 18 Pro, iPhone 18 Pro Max და კომპანიის პირველი დასაკეცი სმარტფონი, რომელსაც მედიაში ჯერჯერობით iPhone Ultra-ს უწოდებენ.
ამასთან, ჩვეულებრივი iPhone 18, iPhone 18e და მეორე თაობის iPhone Air შესაძლოა მხოლოდ 2027 წლის გაზაფხულზე გამოჩნდეს.
ეს Apple-ისთვის მნიშვნელოვანი ცვლილებაა: კომპანია სეზონს პრემიუმ პროდუქტებით გახსნის, ხოლო შედარებით ხელმისაწვდომი მოდელები მოგვიანებით გამოვა.
მთავარი ვარსკვლავი – დასაკეცი iPhone
ყველაზე დიდი ინტერესი Apple-ის პირველ დასაკეც სმარტფონს უკავშირდება. გავრცელებული ინფორმაციით, მოწყობილობა წიგნივით გაიხსნება და უფრო დიდი ეკრანის მქონე ფორმატს მიიღებს.
მისი სავარაუდო ფასი კი iPhone-ის ისტორიაში უპრეცედენტო იქნება – სხვადასხვა პროგნოზით, დაახლოებით 2 000-2 300 დოლარიდან. ზოგიერთი შეფასება ფასს 2 000 დოლარზე ოდნავ დაბლა ან მაღლა ათავსებს, ხოლო დიდი მეხსიერების ვერსიების ღირებულება შესაძლოა კიდევ უფრო მაღალი იყოს.
Financial Times-ის ცნობით, Apple ამ პროდუქტზე დაახლოებით რვა წლის განმავლობაში მუშაობდა. კომპანიის მიზანია დასაკეცი სმარტფონების ბაზარზე შევიდეს არა უბრალოდ კიდევ ერთი მსგავსი მოწყობილობით, არამედ ისეთი პროდუქტით, რომელიც მომხმარებელს კონკურენტებისგან განსხვავებულ გამოცდილებას შესთავაზებს.
ბაზარი კი უკვე საკმაოდ კონკურენტულია. Apple-ის ღონისძიებამდე რამდენიმე დღით ადრე Huawei-მ და Xiaomi-მ ახალი დასაკეცი მოდელები წარმოადგინეს. Huawei-ს ზოგიერთი მოდელის ფასი დაახლოებით 3 700 დოლარსაც აღწევს, ხოლო Xiaomi-ის ახალი დასაკეცი სმარტფონი დაახლოებით 1 540-2 100 დოლარის დიაპაზონში იყიდება.
iPhone 18 Pro – უფრო დახვეწილი, ვიდრე რევოლუციური
თუ ანალიტიკოსების პროგნოზებს შევაჯამებთ, iPhone 18 Pro-ს მთავარი განახლებები რადიკალურ დიზაინზე მეტად ტექნოლოგიურ გაუმჯობესებებს შეეხება.
მოსალოდნელია ახალი თაობის A20 Pro პროცესორი, გაუმჯობესებული კამერის სისტემა, მათ შორის ცვლადი დიაფრაგმის მთავარი კამერა, უფრო დიდი ბატარეა და ეკრანის ზედა ნაწილში Dynamic Island-ის შემცირება.
ანალიტიკოსების შეფასებით, ეს შეიძლება არ იყოს ისეთი მასშტაბური ტექნოლოგიური ნახტომი, როგორიც iPhone-ის ზოგიერთი წინა თაობა იყო. სწორედ ამიტომ Apple-ისთვის განსაკუთრებით მნიშვნელოვანი ხდება ახალი AI ფუნქციები და პრემიუმ მოდელების პოზიციონირება.
რატომ იქნება iPhone 18 უფრო ძვირი ?
ახალი iPhone-ის ფასებზე საუბრისას მთავარი ეკონომიკური ფაქტორი მხოლოდ ახალი ტექნოლოგიები არ არის.
მსოფლიოში მეხსიერების ჩიპების დეფიციტმა კომპონენტების ფასი მნიშვნელოვნად გაზარდა. მიზეზად, პირველ რიგში, ხელოვნური ინტელექტის ინფრასტრუქტურის სწრაფი ზრდა სახელდება – მონაცემთა ცენტრები უზარმაზარი რაოდენობით მეხსიერების ჩიპებს მოიხმარენ და მწარმოებლები უფრო მოგებიან AI-სეგმენტს ანიჭებენ უპირატესობას.
Apple-ის მაშინდელმა CEO-მ ტიმ კუკმა ჯერ კიდევ ივნისში განაცხადა, რომ მეხსიერებისა და საცავის ჩიპების გაძვირების გამო კომპანიის პროდუქციის ფასების ზრდა საჭირო გახდებოდა.
ამიტომ iPhone 18 Pro-ის სავარაუდო საწყისი ფასი დაახლოებით 1 100-1 200 დოლარი იქნება, ხოლო Pro Max-ის – დაახლოებით 1 320-1 440 დოლარი. ეს ოფიციალური ფასები არ არის და საბოლოო თანხებს Apple პრეზენტაციაზე გამოაცხადებს.
