ლონდონის ქუჩებში Uber-ის პირველი ავტონომიური ტაქსები გამოჩნდა. კომპანია ბრიტანულ სტარტაპ Wayve-სთან თანამშრომლობით თვითმართვადი მგზავრობის სერვისს იწყებს, რაც დიდ ბრიტანეთში ასეთი მომსახურების პირველი კომერციული გაშვებაა.
სერვისის საწყის ეტაპზე Uber-ის მომხმარებლებთან შესაძლოა ჩვეულებრივი ავტომობილის ნაცვლად ელექტრო Ford Mustang Mach-E მივიდეს, რომელიც Wayve-ის ხელოვნური ინტელექტის მართვის სისტემით არის აღჭურვილი. მგზავრობის ღირებულება დამატებითი გადასახადის გამო არ გაიზრდება.
თუმცა ავტომობილში მძღოლი ჯერ კიდევ იქნება. ლონდონში მოქმედი რეგულაციების შესაბამისად, სალონში სპეციალურად მომზადებული და ლიცენზირებული მძღოლი იმყოფება, რომელიც სისტემის მუშაობას აკვირდება და საჭიროების შემთხვევაში ავტომობილის მართვას თავის თავზე იღებს.
პირველ ეტაპზე მომსახურება მცირე რაოდენობის ავტომობილით იწყება და ლონდონის თითქმის მთელ ტერიტორიას მოიცავს, აეროპორტების გარდა. მომხმარებლებს Uber-ის აპლიკაციაში ექნებათ შესაძლებლობა წინასწარ დააფიქსირონ სურვილი, რომ Wayve-ის ავტონომიური ავტომობილი მიიღონ. კომპანიების განცხადებით, ასეთი მგზავრობის სურვილი უკვე 140 ათასზე მეტმა ლონდონელმა გამოთქვა.
Wayve-ის ტექნოლოგია ხელოვნურ ინტელექტზეა დაფუძნებული და მიზნად ისახავს ავტომობილს რთულ ქალაქურ გარემოში ადამიანური მძღოლის მსგავსად გადაადგილება ასწავლოს. ლონდონი ამ მხრივ განსაკუთრებით რთული სატესტო გარემოა – ვიწრო ქუჩები, ინტენსიური მოძრაობა, ქვეითები და არაპროგნოზირებადი საგზაო სიტუაციები სისტემისთვის სერიოზულ გამოწვევას წარმოადგენს.
Uber-ისთვის ლონდონის პროექტი ავტონომიური ტრანსპორტის გლობალური სტრატეგიის ნაწილია. კომპანია თვითმართვადი ავტომობილების მიმართულებით აქტიურად აფართოებს პარტნიორობებს და უკვე მსგავსი სერვისი ზაგრებშიც აქვს გაშვებული. ლონდონის შემდეგ ავტონომიური მგზავრობების მასშტაბის გაზრდა მოთხოვნის, ტექნოლოგიის მზადყოფნისა და რეგულაციების განვითარებაზე იქნება დამოკიდებული.
